Shumë njerëz u vranë dhe u plagosën nga sulmet e kryera nga ushtria izraelite në rajonet qendrore dhe jugore të Rripit të Gazës gjatë gjithë natës.
Izraeli vazhdon sulmet e tij në Rripin e Gazës për të 283-ën ditë, ku shkaktoi një fatkeqësi të madhe humanitare duke i detyruar njerëzit të mbeten të uritur dhe të etur.
Sipas lajmeve të agjencisë zyrtare palestineze WAFA, ushtria izraelite ka kryer sulme në lagjet Tel el-Heva, Sheikh Ajlin dhe Es-Sabra të Gazës. Shumë njerëz u vranë dhe u plagosën në këto sulme.
Helikopterët izraelitë hapën gjithashtu zjarr ndaj banorëve të Gazës në zonën e hapur në Tel el-Heva. Njësitë e artilerisë izraelite bombarduan gjithashtu zonën e Rrugës së 8-të në lagjen Zaitoun të Gazës.
Ka pasur edhe njerëz të vrarë dhe të plagosur në sulmin e kryer nga avionët luftarakë izraelitë në kampin e refugjatëve Al-Meghazi të Gazës.
Teksa ekipet e ndihmës së parë vazhdojnë përpjekjet e tyre të kërkimit dhe shpëtimit në zonat e sulmuara, ata ende nuk kanë ndarë informacione të qarta për numrin e vdekjeve dhe të plagosurve.
Në sulmet e Izraelit në Rripin e Gazës që nga 7 tetori, 38.584 palestinezë, përfshirë të paktën 15.694 fëmijë dhe 10.279 gra, vdiqën dhe 88.881 persona u plagosën./aa
