Egjipti po bashkëpunon me Katarin dhe SHBA-në për të tejkaluar hendekun midis Izraelit dhe Hamasit dhe për të arritur një marrëveshje armëpushimi në Gaza, duke përfshirë shkëmbimin e të burgosurve.
Një raund i ri i bisedimeve për armëpushim në Gaza do të fillojë sot në kryeqytetin e Katarit, Doha.
“Përpjekjet intensive të Egjiptit vazhdojnë për të arritur një marrëveshje armëpushimi në Gaza”, tha kanali shtetëror Al-Qahera News, duke cituar një burim të nivelit të lartë.
"Egjipti ripërsërit për të gjitha palët nevojën për të gjetur një formulë konsensusi për të arritur një armëpushim urgjentisht", shtoi ai.
Burimi tha se ndërmjetësit nga Egjipti, Katari dhe SHBA-ja po bashkëpunojnë "për të tejkaluar hendekun midis Izraelit dhe Hamasit për të arritur një marrëveshje armëpushimi".
Hamasi dje njoftoi se do t'u bashkohet bisedimeve të ardhshme të armëpushimit dhe shkëmbimit të pengjeve në Gaza nëse merr një angazhim të qartë nga Izraeli në lidhje me zbatimin e propozimit të mbështetur nga presidenti amerikan Joe Biden.
Në muajin maj, Biden tha se Izraeli prezantoi një marrëveshje prej tri fazash që do t'i jepte fund armiqësive në Gaza dhe do të siguronte lirimin e pengjeve të mbajtura në enklavën bregdetare. Plani përfshin një armëpushim, një shkëmbim të burgosurish dhe rindërtimin e Gazës.
Për muaj të tërë, Egjipti, Katari dhe SHBA-ja janë përpjekur të arrijnë një marrëveshje midis Izraelit dhe Hamasit për të siguruar një shkëmbim të burgosurish dhe armëpushim dhe për të lejuar hyrjen e ndihmave humanitare në Rripin e Gazës.
Por përpjekjet e ndërmjetësimit kanë ngecur për shkak të refuzimit të kryeministrit izraelit Benjamin Netanyahu për të përmbushur kërkesat e Hamasit për të ndaluar luftën.
Duke shpërfillur rezolutën e Këshillit të Sigurimit të OKB-së që kërkon një armëpushim të menjëhershëm, Izraeli është përballur me reagim ndërkombëtar në mes të ofensivës brutale të vazhdueshme në Gaza që nga sulmi i 7 tetorit të vitit të kaluar nga grupi i rezistencës palestineze Hamas.
Mbi 40 mijë palestinezë janë vrarë që atëherë në Gaza, shumica prej tyre gra dhe fëmijë, si dhe mbi 92.400 të tjerë janë plagosur. Më shumë se dhjetë muaj pas luftës izraelite, pjesë të gjera të Gazës mbeten nën rrënoja në mes të një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, vendimi i fundit i së cilës e urdhëroi Tel Avivin të ndalojë menjëherë operacionin ushtarak në qytetin jugor Rafah, ku më shumë se 1 milion palestinezë kanë kërkuar strehim nga lufta përpara se qyteti të pushtohej më 6 maj./aa
