Türkiye bëri thirrje për “masa ndëshkuese dhe shtrënguese” kundër veprimeve të Izraelit që shpërfillin plotësisht ligjin ndërkombëtar.
“Është e domosdoshme që të merren masat e nevojshme ndëshkuese dhe shtrënguese kundër këtyre veprimeve nga Izraeli në kundërshtim të plotë të ligjit ndërkombëtar”, tha Ministria e Jashtme e vendit në një deklaratë, në përgjigje të operacionit të fundit të Izraelit në Bregun Perëndimor.
Deklarata dënoi gjithashtu “operacionin e paligjshëm” të Izraelit dhe komentet e ministrit të Jashtëm izraelit, Israel Katz, për shtrirjen e praktikave nga Gaza në Bregun Perëndimor.
“Ne dënojmë fuqishëm operacionin e paligjshëm të nisur nga Izraeli në Bregun Perëndimor dhe deklaratën e ministrit të Jashtëm izraelit se ata do të zgjerojnë praktikat që kanë zbatuar në Gaza në Bregun Perëndimor”, thuhet në deklaratë.
Ministria më tej tha se “politika gjenocidale” që po ndiqet nga qeveria e kryeministrit izraelit Benjamin Netanyahu është një kërcënim i madh për sigurinë ndërkombëtare.
Ajo gjithashtu u bëri thirrje “pak vendeve që mbështesin pa kushte Izraelin” që të braktisin pozicionin e tyre kundër ligjit dhe ndërgjegjes njerëzore.
Më herët, ushtria izraelite kreu një operacion të madh ushtarak në veri të Bregut Perëndimor të pushtuar, duke bërë ofensivën më të madhe në dy dekada.
Të paktën dhjetë palestinezë janë vrarë që nga fillimi i operacionit, sipas shifrave të fundit të Ministrisë palestineze të Shëndetësisë.
Ministri i Jashtëm izraelit Israel Katz tha se operacioni i ushtrisë përfshin “evakuimin e përkohshëm të banorëve palestinezë” nga zonat në veri të Bregut Perëndimor.
Gjatë viteve të fundit, forcat izraelite kanë kryer bastisje të rregullta në Bregun Perëndimor, të cilat u përshkallëzuan pas luftës në Gaza tetorin e kaluar, në të cilën janë vrarë mbi 40.500 palestinezë.
Palestinezët gjithashtu janë sulmuar dhunshëm nga kolonët e paligjshëm izraelitë.
Vdekjet e reja e çojnë numrin e viktimave në Bregun Perëndimor që nga 7 tetori në të paktën 662 dhe gati 5.400 të tjerë të plagosur nga zjarri i ushtrisë izraelite, sipas Ministrisë së Shëndetësisë.
Në një opinion historik më 19 korrik, Gjykata Ndërkombëtare e Drejtësisë e shpalli të paligjshëm pushtimin disadekadësh të tokës palestineze nga Izraeli dhe kërkoi evakuimin e të gjitha vendbanimeve ekzistuese kolone në Bregun Perëndimor dhe Kudsin Lindor./aa
