Universiteti i Mjekësisë dhe degët e tij mbeten ndër më të preferuarit për maturantët, që do të nisin studimet e larta këtë vit akademik.
Nga 7312 aplikantë 1624 kanë fituar të drejtën të ulen në auditoret e Universitetit publik të Mjekësisë këtë vit akademik, ndërsa rreth 500 të rinj do të studiojnë për mjekësi të përgjithshme.
Rektori i Universitetit të Mjekësisë, Xheladin Draçini tha sot për mediet se “ky është grupi më elitar, më ekselentët ndër të gjithë maturantët dhe kjo në të paktën 10 vitet e fundit ka përbërë trend të përvitshëm. Pra nota mesatare për tre vitet e shkollës së mesme për të gjithë aplikantët e mjekësisë është 9.92 pra mesatarja m2 është 9.52 pra e provimeve specifike të mjekësisë dhe në total 9.72”.
Sa i përket kontratës detyruese për të punuar brenda vendit pas diplomimit, Draçini tha se “në dijeninë time nuk ka një gjë të tillë për momentin, jemi plotësisht të hapur dhe i vlerësojmë mundësitë e karrierës për studentët tanë, por studimet në Universitetin e Mjekësisë mbështeten në platformën ligjore ekzistuese dhe në dijeninë time nuk ka ndryshime”.
Njësoj si vitet e kaluara maturantët ekselentë do të mbështeten me bursa, ndërsa të tjerët do paguajnë tarifën e shkollimit sipas programit të studimit në Universitetin e Mjekësisë.
Regjistrimi në universitet nis me 30 gusht dhe raundi i parë përfundon me 13 shtator./ata
