Greqia zyrtarizon taksën 20 euro për turistët që vizitojnë Mykonos dhe Santorini. Kjo masë vjen kundër turizmit masiv dhe fluksit në rritje të anijeve turistike që ndalen në brigjet e tyre.
Plani për vendosjen e taksës është njoftuar nga vetë kryeministri Kyriakos Mitsotakis në edicionin e 88-të të Panairit Ndërkombëtar të Selanikut, por mbetet ende e paqartë se kur do të hyjë në fuqi.
"Greqia nuk ka një problem strukturor të mbiturizmit. Ajo ka një problem të përqendruar në disa destinacione dhe në disa javë apo muaj të vitit. Kroçeret vënë nën presion Mykonos dhe Santorini dhe për këtë arsye çmimi do të jetë 20 euro", shpjegoi kreu i qeverisë greke në një konferencë për shtyp.
Duke shprehur shqetësimin për fluksin e anijeve turistike, ai tha së është shumë e rëndësishme që ndërhyrja për numrin e anijeve që mbërrijnë në destinacionin e tyre në të njëjtën kohë.
Në vitin 2023, rreth 800 kroçere me 1.3 milionë pasagjerë zbarkuan në ishullin e Santorinit ku jetojnë vetëm 15.500 banorë, sipas shoqatës greke të porteve.
Nga rekordi prej 32.7 milionë turistë që vizituan Greqinë vitin e kaluar, rreth 3.4 milionë, ose një në dhjetë vizitorë, shkuan në ishullin e Santorinit.
Për shkak të këtij fluksi të paprecedentë qeveria synon tanimë të ndërhyjë në numrin e anijeve që mbërrijnë në destinacionin e tyre në të njëjtën kohë, duke e gjykuar të nevojshme të vërë frenat në ishujt ku po vihen në provë kufijtë e infrastrukturës./OraNews
