Kuvendi i Shqipërisë mblidhet për herë të dytë në këtë sesion të ri parlamentar ditën e sotme (12 shtator), në orën 10:00.
Rendi i ditës do të nisë fillimisht me një interperlancë mes kryeministrit Edi Rama dhe kreut të Grupit Parlamentar të Partisë Demokratike, Gazment Bardhi në lidhje me skandalin e mbetjeve të rrezikshme toksike në Portin e Durrësit.
Kjo interperlancë është kërkuar nga demokrati Bardhi.
Nga një komunikim për mediat dy ditë më parë, Kreu i Grupit Parlamentar të Partisë Socialiste, Niko Peleshi, njoftoi se Rama pritet të jetë i pranishëm në interperlancë, por nëse ndodh që të ketë mungesë prej tij, kryeministri do të zëvendësohet për diskutim nga ministri Taulant Balla.
Po kështu, në rendin e ditës është parashikuar dhe një interperlancë me zv.kryeministren Belinda Balluku, e kërkuar nga një grup deputetësh të Partisë Demokratike.
Interpelanca do të mbahet për ndërtimin e segmentit rrugor Thumanë-Kashar dhe aksin “Rruga e Kombit”, në lidhje me bllokimin e aksesit të qytetarëve që banojnë në zonat pranë, të cilët ankohen gjithashtu dhe për rënien e të ardhurave në bizneset në këto rrugë.
Një pikë tjetër e rëndësishme e rendit të ditës është edhe shqyrtimi i mandatit të Olta Xhaçkës, për dërgimin në Gjykatën Kushtetuese të mocionit të 1/10 së deputetëve për papajtueshmërinë e mandatit.
Rendi i ditës
PËR MBLEDHJEN E KUVENDIT NË SEANCË PLENARE, DATË 12.9.2024, ORA 10:00
Në mbështetje të nenit 7, pika 6, dhe nenit 27/1 të Rregullores së Kuvendit, bazuar në kalendarin e punimeve për periudhën 2 shtator 20 shtator 2024,
URDHEROJ:
1. Mbledhjen e Kuvendit në seancë plenare në datën 12.9.2024, ora 10:00.
II. Rendi i ditës i seancës plenare është si më poshtë:
1. Miratimi i procesverbalit të seancës plenare të datës 2.9.2024.
2. Njoftime.
3. Interpelancë urgjente me Kryeministrin, zotin Edi Rama, kërkuar nga deputeti Gazment Bardhi.
4. Interpelancë urgjente me ministren e Infrastrukturës dhe Energjisë, zonjën Belinda Balluku, kërkuar nga një grup deputetësh të Partisë Demokratike.
5. Akti normativ nr. 2, datë 1.8.2024, “Për disa ndryshime dhe shtesa në ligjin nr. 123/2014 “Për urdhrin e mjekëve në Republikën e Shqipërisë”.
6. Akti normativ nr. 3, datë 28.8.2024, “Për disa ndryshime dhe shtesa në ligjin nr. 97/2023 “Për buxhetin e vitit 2024”, të ndryshuar.
7. Projektligji “Për ratifikimin e marrëveshjes së huas ndërmjet Republikës së Shqipërisë (huamarrësi) dhe Agjencisë Franceze për Zhvillim (huadhënësi) për financimin e projektit “Një hua për politika publike për të mbështetur aftësinë përtëritëse dhe zhvillimin e gjelbër të Shqipërisë.
8. Projektligji “Për ratifikimin e letrës së pjesëmarrjes së Këshillit të Ministrave
të Republikës së Shqipërisë në memorandumin e mirëkuptimit për Qendrën Evropiane të
Ekselencës kundër Kërcënimeve Hibride”.
9. Projektligji “Për disa ndryshime dhe shtesa në ligjin nr. 64/2012 “Për peshkimin”, të ndryshuar.
10. Projektligji “Për inspektimin në Republikën e Shqipërisë”.
11. Projektligji “Për disa ndryshime dhe shtesa në ligjin nr. 43/2023 “Për qeverisjen elektronike”.
12. Projektligji “Për një shtesë në ligjin nr. 43/2016 “Për marrëveshjet ndërkombëtare në Republikën e Shqipërisë”.
13. Projektvendimi “Për dërgimin në Gjykatën Kushtetuese të mocionit të 1/10 së deputetëve për papajtueshmërinë e mandatit të deputetes Olta Xhaçka”.
14. Diskutime për çështje jashtë rendit të ditës.
III. Ngarkohen shërbimet e Kuvendit për publikimin e rendit të ditës të seancës plenare, njoftimin e anëtarëve të Kuvendit me anë të mjeteve të komunikimit elektronik, si dhe përgatitjen e dokumentacionit parlamentar që do të shqyrtohet.
IV. Ky urdhër hyn në fuqi menjëherë.
/GazetaShqiptare
