Një gjykatë në Istanbul dënoi sot 37 persona për spiunazh për agjencinë izraelite të inteligjencës Mossad.
Gjykata e Lartë Penale e Istanbulit dënoi me tetë vjet e katër muaj burg Ahmet Koray Ozgurun dhe Alperen Erkut pasi u shpallën fajtorë për “marrje informacioni të ndaluar me qëllim spiunazhi”.
Përveç kësaj, 35 të pandehur të tjerë morën secili nga gjashtë vjet e tetë muaj burg për një krim të ngjashëm.
Kur gjykata shpalli vendimin, shumica e të dënuarve ishin të pranishëm ose të përfaqësuar nga avokatët e tyre. Para vendimit, avokatët mbrojtës pohuan se nuk kishte prova konkrete kundër klientëve të tyre dhe kërkuan lirim.
Megjithatë, gjykata shpalli të pafajshëm 19 persona nga akuza e “marrjes së informacionit të ndaluar me qëllim spiunazhi”, pasi nuk kishte prova të mjaftueshme për të vërtetuar krimin e tyre.
Më herët, Zyra e Kryeprokurorit Publik të Istanbulit deklaroi në aktakuzë se agjencia e inteligjencës izraelite ka përdorur aplikacione celulare për të kryer operacione spiunazhi.
Sipas dokumentit, shërbimi i inteligjencës izraelite ka formuar një ekip në internet për të siguruar fonde nga distanca, për të transferuar para nëpërmjet korrierëve të drejtpërdrejtë dhe për të kryer misione taktike që synojnë operacione specifike.
Aktakuza thekson se kontakti fillestar është bërë përmes aplikacioneve si Telegram, WhatsApp, llogaritë e mediave sociale, LinkedIn dhe email.
Komunikimi ishte rreptësisht i kufizuar në këto aplikacione, pa lejuar thirrje me video ose zanore. Prokurori gjithashtu deklaroi se pagesat për këto detyra kryheshin duke përdorur shërbimet ndërkombëtare të transferimit të parave, kriptovalutat, zyrat e transfertave bankare dhe korrierët e drejtpërdrejtë.
Për detyra më komplekse janë përdorur detektivë, ndërsa të dënuarve që kishin më pak gjasa të tërhiqnin dyshime u ishin caktuar role taktike.
Ata kishin për detyrë të menaxhonin grupet në WhatsApp, të dizajnonin uebsajte dhe gazeta online, të bënin kërkime, të transferonin para, të dokumentonin foto dhe video, madje edhe të kryenin sulme fizike, vjedhje dhe operacione mbikëqyrjeje.
Detektivët, nga ana tjetër, kishin për detyrë mbledhjen e informacionit biografik, kryerjen e hetimeve, monitorimin e objektivave dhe aksesin në informacione të ndjeshme nga bazat shtetërore të të dhënave./aa
