Në Gjykatën e Posaçme rifilloi sot, pas një viti pezullim për shkak të mosmarrjes dijeni personalisht, gjykimi në mungesë i çështjes penale ndaj të pandehurve Dritan Rexhepi, i arrestuar në Ekuador dhe Gentian Funiqi, i arrestuar në Spanjë.
Rexhepi është i dyshuari kryesor për trafikimin e kokainës në Europë nga Amerika Latine, pjesë e organizatës kriminale të emërtuar “Kompania Bella”. Ai së bashku me Gentian Funiqin janë të dyshuar si porositësit e rrëmbimit të Jan Prengës, janarin e vitit 2020 në Kamëz, si presion për vëllanë e tij, që kishte vjedhur një sasi droge në Angli. Prenga ndërroi jetë, ndërsa ende nuk është gjetur trupi i tij.
Gjithashtu, rifilloi gjykimi edhe për Geraldo Martini, Aldo Majnishta, Martin Bleta, Korado Geshtenja e Artan Docaj, të akuzuar si grup i strukturuar kriminal për rrëmbimin e Jan Prengës.
Për të njëjtin rast, dje filloi gjykimi në mungesë edhe i Altin Hajrit, edhe ky i akuzuar për të njëjtat akuza.
Në shtatorin e vitit të kaluar, Gjykata e Posaçme dënoi me burgim të përjetshëm një nga të akuzuarit përngjarjen, Festim Bexhdilin, i vetmi i arrestuar për rastin, ish-kopshtar në kompleksin “Golden” në Shijak.
