Epoka romantike, e njohur për kërkimin e thellë të shpirtit dhe ndjenjave të pakufishme, do të zbulohet në skenën e Teatrit Kombëtar të Operës dhe Baletit këtë tetor.
“Gjenerata romantike” titullohet koncerti i pianistëve të talentuar italianë Gianluca Buonocore dhe Lorenzo Villani, që do të ngjitet në skenën e Teatrit Kombëtar të Operës dhe Baletit më 10 tetor.
Kur tingujt e Shopenit (Chopin) dhe Shumanit (Schumann) bashkohen, krijojnë më shumë sesa muzikë – një rrugëtim emocional dhe artistik, sjellë me mjeshtëri nga partneriteti me Konservatorin “Giuseppe Martucci” të Salernos dhe shoqatën “Scarlatti.”
Pianistët e talentuar Gianluca Buonocore dhe Lorenzo Villani do të ofrojnë një interpretim të fuqishëm dhe pasionant, duke ndërlidhur shpirtrat e dy gjigantëve të muzikës romantike në një duet mahnitës.
TKOB fton artdashësit të përjetojnë një natë të jashtëzakonshme të mbushur me emocione dhe tinguj që kapërcejnë kohën./ata
