Prokuroria e Posaçme kundër Korrupsionit dhe Krimit të Organizuar, (SPAK) ka mbyllur hetimet dhe ka marrë të pandehur ish-kryetarin e bashkisë së Pogradecit Eduart Kapri, i akuzuar për shpërdorim detyre, të kryer në bashkëpunim.
SPAK po ashtu ka dërguar për gjykim edhe dy zyrtarë të tjerë. Bëhet fjalë për Besjan Meçon, në cilësinë e juristit në bashkinë Pogradec, si dhe Besmira Nikon, në cilësinë e specialistes pranë drejtorisë së Planifikimit dhe Zhvillimit të Territorit në bashkinë Pogradec, të cilët gjithashtu akuzohet për veprën penale “Shpërdorimi i detyrës”, kryer në bashkëpunim.
Nga hetimet e SPAK, rezulton se Eduart Kapri dhe dy zyrtarët e tjerë të bashkisë lejuan në kundërshtim me ligjin ndërtimin e pallatit 14 kate të vëllait të tij, Gëzim Kapri.
“Në përfundim të hetimeve, pas grumbullimit të provave dhe pas analizës ligjore të kryer, rezulton se është dokumentuar fakti penal, se me veprimet dhe mosveprimet e tij, shtetasi Eduart Kapri, në cilësinë e Kryetarit të Bashkisë Pogradec, në bashkëpunim me shtetasit Besmira Niko dhe Besjan Meço, kanë lejuar kryerjen e punimeve në kundërshtim me dispozitat ligjore, të objektit pallat 14 katësh, nga shoqëria Gedi sh.p.k., (me administrator shtetasin Gëzim Kapri, vëllain e shtetasit Eduart Kapri), në qytetin e Pogradecit”, njofton SPAK.
Më tej, Prokuroria e Posaçme bën të ditur se “rezulton se në vitin 2009, subjekti Gedi sh.p.k., kishte marrë një leje ndërtimi nga Bashkia Pogradec, për ndërtimin e Objektit “Kompleks Banimi dhe Shërbimi”, 1 kat nëntokë + 2 kate ambiente shërbimi + 9 kate ambiente banimi, në lagjen nr. 3 të qytetit Pogradec. Në atë kohë administrator i shoqërisë Gedi sh.p.k., ishte shtetasi Eduart Kapri”.
Sipas SPAK, “në kushtet kur Bashkia Pogradec, i’a kishte refuzuar zgjatjen e afatit të kësaj leje ndërtimi, për shkak se afati për përfundimin e punimeve ishte data 09.12.2014 dhe kërkesa e subjektit ndërtues ishte depozituar me shkrim në datë 05.11.2014 (jashtë afateve ligjore ta parashikuara nga ligji 107/2014 “Për planifikimin dhe zhvillimin e territorit”, dhe kur çështja ndodhej ende për gjykim pranë Gjykatës Administrative të Apelit Tiranë, Kryetari i Bashkisë Pogradec, tashmë shtetasi Eduart Kapri, me vendimin nr. 99, datë 31.03.2016, me objekt “Leje për rishikim të kushteve të lejes”, lejoi jo vetëm përfundimin e punimeve të pezulluara, por dhe ndërtimin e një objekti 14 katësh, në rrugën “Reshit Çollaku”, Pogradec, nga shoqëria ndërtuese “Gedi” sh.p.k, me administrator vëllain e tij, shtetasin Gëzim Kapri”.
Ky ndërtim, e përmbyll SPAK njoftimin, “u lejua në kundërshtim me nenet 40 dhe 48 të ligjit 107/2014 “Për planifikimin dhe Zhvillimin e Territorit”, i ndryshuar, nenit 66 të Kodit të Procedurës Administrative, në shkelje të vendimit nr. 43, datë 26.01.2015, të Gjykatës Administrative të Shkallës së Parë Korçë, duke krijuar kështu përfitime materiale të padrejta për shoqërinë “Gedi” sh.p.k. pasi u shtua sipërfaqja ndërtimore me dy kate”.
Dhënia e këtij vendimi, sipas Prokurorisë së Posaçme, është bërë në kushtet e konfliktit të hapur të interesit, nga ana e të pandehurit Eduart Kapri./ata
