SHBA shprehu shqetësim të madh për stërvitjet ushtarake kineze pranë Tajvanit, disa ditë pasi presidenti Lai Ching-te tha se Pekini nuk kishte "të drejtë" të përfaqësonte vendin e tij.
"SHBA janë seriozisht të shqetësuara nga stërvitjet e përbashkëta ushtarake të Ushtrisë Çlirimtare Popullore në ngushticën e Tajvanit dhe rreth Tajvanit", tha zëdhënësi i Departamentit të Shtetit, Matthew Miller, duke iu referuar ushtrisë kineze.
"Përgjigja e Republikës Popullore të Kinës (RPK) me provokime ushtarake ndaj një fjalimi rutinë vjetor është e pajustifikuar dhe rrezikon përshkallëzim", tha Miller.
Ushtria kineze tha të hënën se organizoi forca të shumta për një stërvitje të përbashkët rreth ngushticës së Tajvanit dhe rajoneve veriore, jugore dhe lindore të ishullit.
Sipas zëdhënësit të Komandës Lindore të Ushtrisë Çlirimtare Popullore Kineze (PLA), Li Xi, stërvitjet "Shpata e përbashkët" (Joint Sword)-2024B përfshinin anije dhe avionë që i afrohen Tajvanit nga drejtime të shumta dhe kryejnë stërvitje të sulmeve të forcave të përbashkëta.
Li theksoi se stërvitja shërbeu si një pengesë e fortë për aktivitetet që lidhen me "pavarësinë e Tajvanit" dhe ishte e nevojshme për të mbrojtur "sovranitetin kombëtar dhe unitetin kombëtar" të Pekinit.
Departamenti amerikan i Shtetit tha se SHBA i bën thirrje Kinës të veprojë me përmbajtje dhe të shmangë çdo veprim të mëtejshëm që mund të dëmtojë paqen dhe stabilitetin përgjatë ngushticës së Tajvanit dhe në rajonin më të gjerë, gjë që tha se është thelbësore për paqen dhe prosperitetin rajonal dhe një çështje e shqetësimit ndërkombëtar.
"Ne vazhdojmë të monitorojmë aktivitetet e RPK-së dhe të koordinohemi me aleatët dhe partnerët në lidhje me shqetësimet tona të përbashkëta", tha Miller, duke shtuar: "SHBA mbetet e përkushtuar ndaj politikës së saj për një Kinë, të udhëhequr nga Akti i Marrëdhënieve me Tajvanin, tre komunikatat e përbashkëta dhe Gjashtë Garancitë".
Kjo ishte hera e dytë që ushtria kineze zhvilloi stërvitje pranë ishullit që kur presidenti i Tajvanit Lai Ching-te u inaugurua në maj të këtij viti. Stërvitja vjen pas një fjalimi për ditën kombëtare nga Lai, i cili tha se Pekini "nuk kishte të drejtë" të përfaqësonte vendin e tij pasi Taipei nuk është një "vartës" i Pekinit.
"Republika e Kinës (Tajvani) dhe Republika Popullore e Kinës nuk janë në varësi të njëra-tjetrës. Në këtë tokë, demokracia dhe liria rriten dhe lulëzojnë. Republika Popullore e Kinës nuk ka të drejtë të përfaqësojë Tajvanin", tha ai./aa
