Rama: Mbi 300 mijë punonjës dolën nga informaliteti, rritje dinjitoze të pensioneve

I ftuari i radhës i kryeministrit Edi Rama në podkastin “Flasim”, ishte themeluesi i “Mullirit të vjetër”, Lulëzim Huqi.

Huqi në bashkëbisedimin me kryeministrin Rama foli për rrugëtimin e tij në këtë biznes, që nis me pastrimin e një mulliri kafeje të vjetër për të bluar e shitur kafe me pako, e që sot aroma e saj ndjehet edhe pranë Piramidave të Egjiptit. Huqi tregon se gjysma e suksesit të tij vjen nga forca punëtore, të cilën, ai beson se është ndër të paktët që e ka kuptuar.

Kryeministri Edi Rama bëri të ditur se ende sot ka biznese që nuk kanë arritur të kuptojnë që fuqia më e madhe e tyre është forca punëtore, ndërsa foli për aksionin antiinformalitet të nisur tashmë në të gjithë vendin për të formalizuar tregun e punës, si një ndër mekanizmat për të siguruar edhe pensione dinjitoze.

“Akoma shumë biznese nuk kanë dashur ta kuptojnë që investimi më i rëndësishëm është te njerëzit që ke në skuadrën e biznesit tënd. Nëse nuk ke atë kapital të sigurt, të patundshëm, të rrofshin dekoret dhe mundimet e tjera, pasi atyre të gjithave iu bie vlera”, deklaroi Rama.

Rama tha më tej se që prej vitit 2013 janë nxjerrë nga informaliteti dhe futur në tregun e punës mbi 300 mijë të punësuar.

“Nga 2013-a e deri sot, kemi nxjerrë nga e zeza, formalizuar e futur në skemën e sigurimeve shoqërore 300 mijë punonjës. Ka ende shumë akoma që duhet bërë. Duam të shtyjmë fort në këtë moment formalizimin e pagave, pasi kemi marrë vendimin të hapim një korsi të re për pensionet. Do të fillojmë me një qasje agresive për t’u dhënë më shumë pensionistëve, duke nisur nga bonusi i fundvitit. Kemi plan për një rritje më domethënëse sesa ka qenë rritja nga indeksimi, edhe pse po të shikojmë pensionet nga u nisën, pavarësisht se janë shumë të vogla, rritja ka qenë domethënëse, por e papërfillshme në raport me sa u rritën pagat dhe rritja ekonomike”, deklaroi Rama.

Rama theksoi se pensionet nuk janë si taksat. Ato, sipas tij, qeveria i merr në fund të muajit nga ata që janë të punësuar dhe do t’i shpërndash tek ata që marrin pension.

“Nuk ka një arkë shteti posaçërisht për ata që marrin pensione. Pensionet janë skemë direkte e mbështetjes së atyre që janë në punë për ata që kanë dalë në pension”, tha ai.

Kryeministri nënvizoi se ka një lloj sensibilizimi sa i përket kësaj situate dhe se beson se ky aksion do të ecë para.

Sipas tij, me aksionin kundër informalitetit nuk synohet goditja e bizneseve dhe se fiskalizimi dhe inteligjenca artificiale do të jenë elementë që do të ndihmojnë në këtë proces.

“Nëse do t’i fshehësh pagat, ke një mijë mënyra. Por me githë sa kemi bërë me inteligjencën artificiale në fiskalizim, do ta kemi më të lehtë. Nuk duam të rëndojmë biznesin me kontrolle apo goditje, që shpesh bëjnë më shumë dëm sesa fitim. Nuk diskutohet që do ta bëjmë luftën kundër informalitetit. Është proces që nuk mbaron”, tha ai.

Sot “Mulliri i vjetër”, që nisi si biznes familjar, gjendet në shumë vende jo vetëm në raftet e marketeve.

“E gjitha nisi si një biznes i vogël familjar në tregtimin e kafesë së pjekur dhe të bluar turke që në vitin 1994, pasi u kthyem pas një periudhe 2-vjeçare emigrimi në Gjermani. Me kalimin e viteve, kafja turke “Mulliri i Vjetër” filloi të njihej duke krijuar një emër të mirë në tregun lokal. Gjithçka ecte mirë dhe ishte koha për zgjerim fillimisht në tregun rajonal, duke nisur me Kosovën, e më pas në Maqedoninë e Veriut. E sot në Egjipt”, tregon Huqi.

Pika e parë e kafesë “Mulliri i vjetër”, përtej rajonit, u hap në Nju-Kajro, Egjipt.

“Tani ne vërejmë interes edhe në tregje përtej atyre shqipfolëse. Egjipti është një ndër këto vende. Pikën e parë e hapëm në Nju-Kajro. Por ishte surprizë. Pas kësaj, na kontaktoi një kompani që ka marrë me koncesion piramidat. Erdhën dhe panë kafenë në Nju-Kajro. Sot mulliri është afër një nga piramidave më të mëdha të Egjiptit”, thotë ai.

Huqi ka në plan të shkojë më tutje. Në Riad e Medinë, ndërsa gjendet në marketet e Europës, Shteteve të Bashkuara të Amerikës, Angli, e deri në Kanada.

Një ndër arsyet pse ky biznes po rritet dita-ditës, tregon ai, është forca punëtore.

“Mulliri i Vjetër” ka sot 547 punonjës në Shqipëri. Në total në të gjithë botën, ka rreth 700 punonjës.

Huqi thotë se paga mesatare bruto shkon në 1 mijë euro, ndërsa minimalja 600 euro.

“E them me krenari se paga mesatare shkon rreth 1 mijë euro. Paga minimale 600 euro. Jam i lumtur që në këtë situatë të vështirë, nuk kemi pasur problem për stafin”, tha ai./ata