Komisioneri Shtetëror i Zgjedhjeve, Ilirjan Celibashi zhvilloi sot një takim në KQZ me ministrin për Evropën dhe Punët e Jashtme, Igli Hasani dhe ministrin e Brendshëm Ervin Hoxha, ku diskutuan për koordinimin e angazhimeve respektive për realizimin e votimit nga jashtë.
“Ministria e Brendshme ka nisur dhe do të përmirësojë mekanizma që ndihmojnë votuesit nga jashtë për rinovimin e dokumenteve të identifikimit”, theksoi Celibashi në një postim në rrjetet sociale.
Më së pari, shtoi ai, “tani votuesit nga jashtë nuk kanë detyrimin për të aplikuar për të dy kategoritë e dokumenteve të identifikimit”.
“Në kuadër të këtij procesi janë ulur kostot e këtij shërbimi”, u shpreh ai.
Nga ana tjetër, u shpreh ai, “MEPJ ka nisur praktikën e zhvendosjes së shërbimeve konsullore më pranë shtetasve shqiptarë aty ku janë dhe lehtësimit të marrjes së këtyre shërbimeve”.
Në takim u diskutua edhe mbi masat që këto dy institucione do të duhet të marrin për të mbështetur veprimin e KQZ në kuadër të realizimit të votimit nga jashtë./ata
