Nga foltorja e Kuvendit, ish-kryeministri, Sali Berisha, deklaroi se Gjykata në Nju-Jork ka bërë zbulime tronditëse për veprimtarinë e McGonigal dhe lidhjet e tij me Edi Ramën.
Berisha theksoi se është vendosur që gjykata të konfiskojë të gjitha pasuritë e McGonigal kudo që ndodhen. Për këtë arsye, ai tha se është jetike ngritja e Komisionit hetimor parlamentar për të zbuluar dhe gjetur pasuritë e McGonigal në Shqipëri.
“Gjykata në Nju-Jork ka bërë zbulime tronditëse për veprimtarinë e McGonigal dhe lidhjet e tij me Edi Ramën. Është vendosur që gjykata të konfiskojë të gjitha pasuritë e McGonigal kudo që ndodhen. Themi se është jetike komisioni hetimor parlamentar për të zbuluar dhe gjetur pasuritë e McGonigal në Shqipëri, të cilat i vendosi me Ramën, Duçkën dhe Nezën. Afera McGonigal do e ndjekë Ramën deri në ditën e fundit të ekzistencës së tij. McGonigal ishte një tradhtar i vendit të tij. Në këtë kontekst, një hije e zezë bie mbi të gjithë ju, jo se ju keni afera personale me McGonigal, por se njeriu që ju mbështesni është korruptori dhe skllavi i tij”, deklaroi Berisha.
“Drejtësia amerikane çdo ditë po gjen dhe zbulon fakte të reja. Ne këtu do ngremë komision hetimor parlamentar për të zbuluar fakte të reja, me të cilat Edi Rama del fund e krye i inkriminuar. A mund të imagjinoni ju që Duçka, këshilltari privat i Rramës, të vërë gjoba, të denoncohet dhe të mos lëvizë drejtësia e kontrolluar shqiptare as edhe një gjë më të vogël. Jeni të zhytur në shkallën më të thellë në këtë aferë. Ndaj është emergjente ngritja e komisionit për të hetuar aferën Rama-McGonigal”, shtoi Berisha.
