Mjekët e shërbimit të kirurgjisë digjestive në QSUT kanë kryer me sukses një tjetër ndërhyrje të rrallë për heqjen e një mase tumorale te një 35 vjeçare.
Kryeministri Edi Rama ndau sot lajmin e mirë për kryerjen me sukses të kësaj ndërhyrje, ndërsa përgëzoi ekipin e mjekëve.
“Pas një kalvari të gjatë vuajtjesh, një vajzë e re 35-vjeçare ka dalë me sukses nga një ndërhyrje e rrallë, falë koordinimit të shkëlqyer të ekipeve mjekësore për diagnostikimin, trajtimin dhe operacionin e shkallës së lartë të vështirësisë”, u shpreh Rama në një postim në rrjetet sociale, duke sjellë edhe përmbledhjen e punës së kryer.
Pasi u diagnostikua me një tumor 7 cm të mbiveshkores së majtë, 35- vjeçarja u përgatit në pavijonin e Mjekësisë Interne në mënyrë që të stabilizohej, dhe më pas, ekipi multidisiplinar i mjekëve realizoi ndërhyrjen, e cila rezultoi me sukses.
Rama përgëzoi punën e shkëlqyer të mjekëve prof. Arben Gjata, prof. Krenar Lila, prof. Mihal Tase, prof. Margarita Gjata, dr. Dritan Reovica, dr. Ardit Kaçani, dr. Pranvera Shkëmbi dhe infermieret: Manada Cani, Mirjana Mema, Aida Hajro, Albana Qefalia.
Ndërsa vetë prof. Arben Gjata dha detaje nga kjo ndërhyrje e vështirë, që vuri në dilemë dhe mjekët nëse duhet ta çonin në kryerjen e ndërhyrjes jashtë vendit apo në spitalin e QSUT-së.
“Eshtë një nga rastet e vështira ku kanë ndërhyrë shumë faktorë të mjekësisë në QSUT dhe është një nga rastet e suksesit”, tha Gjata.
