Linja hekurudhore e trenit Tiranë-Rinas-Durrës, Veliaj dhe Balluku inspektojnë punimet

Kryetari i Bashkisë së Tiranës, Erion Veliaj dhe zëvendëskryeministrja dhe njëherazi ministrja e infrastrukturës dhe Energjisë, Belinda Balluku, inspektuan këtë të enjte punimet në kantierin e projektit për ndërtimin e linjës së re hekurudhore Tiranë – Rinas – Durrës.

Gjatë fjalës së tij, Veliaj tha se brenda Tiranës, ku do të ketë tre stacione, do të vijë vetëm një trase e trenit elektrik.

“Jemi në Kthesën e Kamzës, ku bashkia dhe ministria ndajnë një pronë, ndajnë dy projekt. Ne në Tiranë nuk do të vazhdojmë me të pesta këto platforma dhe trase, por vetëm më një trase të trenit elektrik. Do të kemi edhe tre stacione të tjera, te ‘Josif Pashko’, te ‘Jordan Misja’ dhe në fund të Bulevardit të Ri, ose siç quhen ndryshe ‘city stations’. Për të gjithë ata që kanë një shqetësim nëse do të ketë mallra, i siguroj se jo, nuk do të ketë mallra”, sqaroi Veliaj.

Ministrja e Infrastrukturës, Belinda Balluku tha:

“Ky është një tren elektrik, i cili do të ketë një shpejtësi nga kjo pikë deri në Durrës 120 km/h, ndërkohë që nga kjo pikë deri në Tiranë do të variojë nga 50-80 km/h; pra do të jetë me një shpejtësi të moderuar, duke qenë se do të futet brenda në qytet. Duhet pasur parasysh se nuk është Tirana, brenda qytetit, për shkëmbimin e mallrave. Sigurisht, ka platforma të tjera, siç është platforma e Vorës apo edhe vende të tjera, ku do të ketë edhe interseksione me pjesë të tjera të hekurudhës, siç është hekurudha nga Vora deri në Han të Hotit. Kjo hekurudhë është shumë e rëndësishme sepse lidh Tiranën me Durrësin, por jo vetëm me qytetin e Durrësit aty ku do të ndërtohet ballina ujore më e rëndësishme e Ballkanit dhe Porti i Jahteve, por do të lidhë edhe Tiranën me portin e ri të Durrësit të ndërtuar në Porto Romano, përmes nyjes së Sukthit. Kjo është një vepër inxhinierike për t’u krenuar e gjithë Shqipëria. Por, si gjithçka e mirë, nis nga Tirana.”

Kryebashkiaku Veliaj shtoi se kur qeveria dhe Bashkia bëhen bashkë, rezultati janë këto punë të mira që bëhen për qytetin.

“Kur dëgjoj debatet, jo po çfarë na duhet bashkia, çfarë na duhet qeveria, them se bashkia na duhet që të jetë aleat me qeverinë. Ne bashkë bëjmë gjëra që veç e veç e kemi të pamundur. Thirrja për të gjitha bashkitë është që të gjejmë sa më shumë ndihmë, bashkëpunim dhe mbështetje nga qeveria. Kur mendoj se do bëhet për 22 minuta Durrësi dhe për 12 minuta aeroporti, do përfitojë edhe ai që nuk do udhëtojë sepse nuk do ketë më trafik që vjen te Njësia 11 apo te Njësia 7, prej kësaj ngarkese të madhe dhe përdorimit të makinës”, u shpreh Veliaj.

Projekti synon të zhvillojë transportin hekurudhor ndërmjet Durrësit dhe Tiranës, duke përmirësuar infrastrukturën dhe operacionet hekurudhore, duke garantuar sigurinë e lëvizjes, si dhe duke ndërtuar një lidhje të re hekurudhore me aeroportin e Rinasit që është dhe i vetmi aeroport ndërkombëtar i vendit.