Venedikasit u zgjuan të dielën në mëngjes me një pamje të pazakontë, pasi një pjesë e Kanalit të Madh të Venecias dukej se ishte kthyer në ngjyrë jeshile fluoreshente, duke bërë që policia të nisë hetimet mes spekulimeve se mund të ishte planifikuar nga aktivistët mjedisorë.
Autoritetet lokale kanë mbledhur mostra uji dhe kanë hapur një hetim urgjent.
Janë të shumta spekulimet se çfarë mund të ketë bërë që uji rreth urës së famshme të Rialtos të ndryshojë ngjyrë.
Teoritë variojnë nga lëshimi i bojës deri te një protestë nga aktivistët mjedisorë.
Mediat italiane raportuan se policia lokale po shqyrtonte CCTV për të përcaktuar nëse lëshimi mund të kishte qenë një marifet që përkonte me regattën e Volgalonga që po zhvillohej këtë fundjavë.
Në një intervistë me të përditshmen italiane La Repubblica, Maurizio Vesco i Agjencisë Rajonale për Mbrojtjen e Mjedisit tha se analizat e hershme treguan se njolla e gjelbër ka të ngjarë të jetë shkaktuar nga lëshimi i fluoresceinës, një ngjyrë e padëmshme që përdoret zakonisht për të gjurmuar rrjedhën e ujit.
Ndërsa kjo substancë nuk është e pazakontë, Z. Vesco tha se doza e zakonshme ishte një lugë pluhur, por sipas hetimeve është hedhur në ujë të paktën 1 kg ngjyruesi.
“E kam të vështirë të besoj se ishte një incident… dhe se një kilogram fluoresceinë u lëshua rastësisht në kanal”, tha ai për La Repubblica.
Shumë përdorues të mediave sociale thanë se imazhet që dilnin nga Venecia të kujtonin marifetin e vitit 1968 nga artisti argjentinas Nicolás García Uriburu, i cili ngjyrosi ujërat e Kanalit të Madh në të gjelbër për të rritur ndërgjegjësimin për çështjet ekologjike.
