AHMET NURDUHAN

 

Pema e ullirit 2.248-vjeçar, i cili sfidon vitet, vazhdon të simbolizojë paqen në rajonin Mirovica të qytetit të vogël historik të Tivarit në Mal të Zi.

 

Qyteti historik i Tivarit, në bregun e Detit Adriatik, afër kufirit të vendit me Shqipërinë, është i njohur si vendi i pemëve të ullirit.

 

Duke mbajtur emrin "Ulliri i vjetër" 2.248 vjeçar në rajonin e Mirovicës, që do të thotë "vendi i paqes" në Tivar dhe duke dëshmuar paqen në qytet, pema qëndron me gjithë madhështinë e saj, duke sfiduar vitet.

 

Kryetari i Shoqatës së Prodhuesve të Ullirit të Tivarit, Qazim Alkoviq në një prononcim për Anadolu foli për rëndësinë e pemës së vjetër në qytet.

 

Ai tha se pema e vjetër e ullirit ndodhet në rajonin Mirovica të qytetit të Tivarit. "Ky rajon, siç kuptohet nga emri i tij, njihet si një vend ku familjet e zemëruara pajtohen dhe zhvillojnë miqësi. Kjo pemë, e cila është mbi 2.000 vjeçare, ka rëndësi të madhe për banorët e Tivarit, sepse është dëshmi e qytetërimit dhe zhvillimit tonë në frymën e miqësisë", tha Alkoviq.

 

- "Mosha e pemës është përcaktuar nga Fakulteti i Pylltarisë të Universitetit të Istanbulit"

 

Duke vënë në dukje se shoqata e tyre kryen aktivitete si zhvillimi i kultivimit të ullirit dhe trajnimi i prodhuesve të rinj të ullirit, Alkoviq tha se po punojnë për promovimin e ullirit dhe vajit të ullirit si dhe përmirësimin e marrëdhënieve turistike me kultivimin e ullirit.

 

"Në këto punime mësuam se kjo pemë që ne e quajmë 'ulliri i vjetër' është edhe 'ulliri më i vjetër në rajon'. Në kuadër të projektit tonë, një ekip nga Fakulteti i Pylltarisë i Universitetit të Istanbulit erdhi këtu 8 vjet më parë, bëri matje dhe mori të dhënat nga pema. Një muaj më vonë na u dërgua dokumenti zyrtar në lidhje me moshën e kësaj peme. Me certifikatën që morëm në vitin 2015 mësuam se pema ishte 2.240 vjeçare, pra sot është 2.248 vjeçare".

 

- "100 kilogramë ullinj merren nga ulliri i vjetër"

 

Alkoviq thekson se shoqata e tyre kryen traditën e mbledhjes së ullinjve rreth "ullirit të vjetër" çdo vit. "Ne e fillojmë periudhën e vjeljes së ullirit në Mal të Zi duke mbledhur ullinjtë e 'ullirit të vjetër'. Të gjithë marrin pjesë në procesin e vjeljes së ullirit, pavarësisht nga pozicioni i tyre në shoqëri apo gjendja financiare", tha ai.

 

Sipas tij, ullinjtë mblidhen me dorë në mënyrë që të mos dëmtohet pema. Ai tha se nga "pema e vjetër e ullirit" kanë marrë mesatarisht 100 kilogramë ullinj, që është 7-8 kilogramë vaj ulliri.

 

Alkoviq tha se vajin e ullirit që marrin e ruajnë në kuti të posaçme druri dhe se vaji i ullirit i marrë nga një pemë 2.248 vjeçare nuk mund të matet me asnjë pasuri./AA