Një tërmet me magnitudë 6.4 goditi ishullin indonezian Java të premten në mbrëmje, duke plagosur të paktën 10 persona, ndërsa një person vdiq nga sulmi i dyshuar në zemër gjatë tërmetit, tha agjencia e fatkeqësive të vendit (BNPB).
Tërmeti shkaktoi dëme të vogla në qindra shtëpi, disa zyra, objekte shëndetësore dhe arsimore të shpërndara në rajonin e Yogyakarta dhe provincën Qendrore Java, tha zëdhënësi i agjencisë Abdul Muhari për Reuters të shtunën.
Agjencia e gjeofizikës e Indonezisë (BMKG) tha se tërmeti, i cili goditi në një thellësi prej 25 km u ndje në disa qytete në rajonin e Yogyakarta, si dhe Javan lindore dhe qendrore, ishulli më i populluar i Indonezisë, por nuk u dha asnjë paralajmërim për cunami.
Indonezia shtrihet në të ashtuquajturën “Unaza e zjarrit e Paqësorit”, një zonë sizmike shumë aktive ku pllaka të ndryshme në koren e Tokës takohen dhe shkaktojnë një numër të madh tërmetesh dhe vullkanesh.
