Udhëheqësi i lëvizjes rebele pro-iraniane Huthi në Jemen, Abdul Malik al-Huthi tha se forcat e tij do të shënjestrojnë anijet luftarake amerikane nëse vjen deri te ndonjë përshkallëzim i tensioneve në Detin e Kuq.
Ai në fjalimin televiziv tha se lëvizja nuk do të qëndrojë duarkryq përballë ndonjë tendence të SHBA-së për të përshkallëzuar tensionet ose për të synuar Jemenin.
- Krijohet një mision shumëkombësh kundër sulmeve të rebelëve Houthi ndaj anijeve në Detin e Kuq
- Koalicioni i Detit të Kuq: Pse vendet kryesore arabe nuk participojnë?
Huthit kanë kërcënuar se do të shënjestrojnë anijet luftarake dhe anijet amerikane me raketa dhe dronë në rast të ndonjë tensioni në Detin e Kuq. Al-Huthi akuzoi SHBA-në se po përpiqet të militarizojë Detin e Kuq për të mbrojtur anijet izraelite.
Duke theksuar se vendet në kufi me Detin e Kuq do të preken nga ndërhyrja e SHBA-së, Huthi bëri thirrje për veprim që të parandalohen përshkallëzimet.
Departamenti i Mbrojtjes së SHBA-së (Pentagoni) njoftoi më 6 dhjetor se ishin duke negociuar formimin e një "task-force detare" ndërkombëtare kundër sulmeve nga Huthit jemenas ndaj anijeve tregtare në Detin e Kuq.
Sekretari amerikan i Mbrojtjes, Lloyd Austin njoftoi dy ditë më parë se ishte themeluar një mision shumëkombësh i këtij lloji. Misioni përfshin forca nga gjithsej 10 vende, përfshirë SHBA-në, Britaninë e Madhe, Kanadanë, Francën, Italinë, Holandën, Norvegjinë, Sejshelet, Spanjën dhe Bahreinin.
Në mesin e nëntorit, lëvizja Huthi e Jemenit kërcënoi se do të godiste anijet izraelite në Detin e Kuq si hakmarrje për sulmet izraelite ndaj civilëve në Gaza. Shumë kompani detare kanë pezulluar lundrimin në këtë rrugë ditët e fundit./aa
