Tre pjesëtarë të forcave amerikane janë vrarë dhe 28 janë plagosur në një sulm në bazën ushtarake amerikane Al-Tanf pranë kufirit siriano-jordanez, thanë sot zyrtarë amerikanë dhe jordanezë.
"Më 28 janar, tre anëtarë të shërbimit amerikan u vranë dhe 25 u plagosën nga një sulm i njëanshëm me UAS (dron) që goditi një bazë në Jordaninë verilindore, afër kufirit me Sirinë", tha Komanda Qendrore e SHBA-së në një deklaratë për shtyp.
Në një deklaratë nga Shtëpia e Bardhë, presidenti amerikan Joe Biden tha: "Sot, zemra e Amerikës është e rëndë. Natën e kaluar, tre anëtarë të shërbimit amerikan u vranë – dhe shumë u plagosën – gjatë një sulmi ajror pa pilot ndaj forcave tona të vendosura në Jordaninë verilindore pranë kufirit me Sirinë".
"Ndërsa ne jemi ende duke mbledhur faktet e këtij sulmi, ne e dimë se ai është kryer nga grupe militante radikale të mbështetura nga Irani që veprojnë në Siri dhe Irak", shtoi ai.
Por Mohannad Mubaydeen, zëdhënës i qeverisë jordaneze, tha se "sulmi ndaj forcave amerikane pranë kufirit sirian nuk ndodhi brenda Jordanisë", por në vend të kësaj "shënjestroi bazën Al-Tanf në Siri".
Sulmi konsiderohet si një nga sulmet më vdekjeprurëse të fundit ndaj trupave amerikane në Lindjen e Mesme.
Al-Tanf, një bazë e vendosur brenda territorit sirian jashtë kontrollit të regjimit ku takohen kufiri sirian, ai irakian dhe ai jordanez, strehon një numër trupash amerikane.
Baza ishte sulmuar më parë më 4 janar, me dronë të paidentifikuar të interceptuar nga forcat amerikane përpara se të arrinin në bazë./aa
