Zëvendëskryeministrja, njëherësh Ministër i Infrastrukturës dhe Energjisë, Belinda Balluku së bashku me administratorrin e AKUK, Klevis Jahaj dhe kryebashkiakun e Matit, Agron Malaj, inspektuan punimet për ndërtimin e rrjetit të kanalizimeve të ujërave të ndotura dhe ngritjen e impiantit të trajtimit të tyre në bashkinë Mat.

Balluku tha se, “po bëhet një punë gjigande, mbi 33 % të kontratës e kemi në realizim e sipër. Do bëjmë të pamundurën që të përfundojnë përpara sezonit veror, sepse edhe Mati si gjithë Shqipëria kthehet në një destinacion turistik”.

Në këtë kantier, vijoi ajo, ritmet e punimeve duket se janë shumë të mira, teksa apeloi për  mbrojtjen e ujrave larës, një objektiv i rëndësishëm për të përballuar sezonin turistik.

Duke vlerësua këtë ndërhyrje që po realizohet në bashkinë e Matit, Balluku u ndal tek aksioni që Qeveria Shqiptare njoftoi vetëm pak ditë më parë, i cili ka në fokus ujërat larës, dhe reduktimin e ndotjes së tyre. Balluku përsëritii edhe një herë apelin drejtuar subjekteve që operojnë pranë ujërave larës që të marrin masa për trajtimin e ujërave të ndotur.

“Të gjithë ato njësi tregtare që operojë dhe flasim kryesisht për hoteleri, restorante, pika të tjera argëtimi, të cilat operojnë në zonën bregdetare, në të gjitha ato zona ku ndodhen ujërat larëse, liqenet edhe lumenjtë, duhet që të implementojnë një impiant për pastrimin, për purifikimin e ujërave të ndotura para se ato të hidhen në kolektorët apo në ato vende të dizenjuara për tu shkarkuar. Kjo për shkak se tashmë Shqipëria 4 fishon numrin e saj të banorëve gjatë periudhës së sezonit turistik”, tha Balluku.

Për subjektet të cilat do të refuzojnë këto masa, Ministrja e Infrastrukturës dhe Energjisë, solli në vëmendje penalizimet të cilat shkojnë deri në pezullim të aktivitetit të subjekteve.

“Pas 90 ditëve Task Forca do të ketë të drejtën të fillojë të kontrollojë dhe të monitorojë në terren se çfarë ndodh në të vërtetë, a janë këto subjekte tashmë të pajisura me impiantin? Në rast se do të vihet re që disa subjekte nuk e kanë përmbushur këtë kërkesë detyrimisht ato do të gjobiten përmes një mase administrative dhe do ti jepet edhe 60 ditë kohë për implementimin dhe në rast se pas 60 ditësh do të vazhdoj të ketë një mos bindje nga ana e bizneseve për të vendosur impiante, gjoba do të eskalojë, por nga ana tjetër Task Forcës do ti lindë dhe e drejta për të bllokuar aktivitetin e subjekteve”, nënvizoi Balluku duke shtuar se bashkëpunimi edhe me të zgjedhurit vendor është i rëndësishëm në këtë aksion.

Nga ana e tij, kryebashkiaku Malaj vlerësoi invesitmin sa i takon disiplinimit të ujërave të ndotur në bashkinë e Matit. Projekti pritet të jetë gati para sezonit turistik të vitit të ardhshëm, disa muaj para afatit të parashikuar.

“Kolektori kryesor me diametër 1500 do të mbledhë 4 linjat kryesore të qytetit, të fshatit Muzhak dhe të zonës periferike të qytetit. Ky kolektor kryesor do të shkojë me vetërrjedhje pranë impiantit. Projekti parashikon dhe ndëritmin e një impianti para trajtimit të ujërave të ndotura, gjithashtu dhe një godinë për personelin së bashku me laboratorin, lidhjen e energjisë elektrike pranë tij, makineritë dhe pajisjet që i duhen drejtorisë rajonale për ta mirëmbajtur dhe për të operuar në pastrimin e të gjithë rrjetit të kanalizimeve”, njoftoi drejtori Jahaj.

Aktualisht zona periferike e Burrelit dhe fshati Muzhak largimin e ujërave të ndotura e bën ndërmjet gropave septike, të ndërtuara jashtë kushteve teknike, ndërsa pjesa tjetër përmes kanaleve të hapura të cilat paraqesin një rrezik të vazhdueshëm. Me invesitmin që po bëhet kjo problematikë merr zgjidhje./ata