Rey Manaj është sulmuesi i momentit në Superligën turke të futbollit. Lushnjari me Sivasspor këtë sezon ka luajtur 22 ndeshje dhe ka shënuar 13 herë, kjo vetëm në kampionat.
Tanimë për shërbimet e tij janë në garë disa ekipe, me "Takvim" në Turqi që bën me dije se Besiktas me porosi të veçantë të trajnerit Fernando Santos kërkon sulmuesin.
Kontrata e Manaj me Sivasspor skadon në verën e 2026 dhe forma e mirë ka vendosur në lëvizje drejtuesit e Besiktas, që së shpejt do takohen me përfaqësuesit e Manaj dhe të klubit të Sivasspor.
Veç Manajt, Besiktas është në kërkim edhe të Denis Dragus, rumunit që luan me Gaziantep dhe ka shënuar dhjetë gola, duke qenë i huazuar nga Standard Liege në Belgjikë.
Sa i takon Rey Manaj, 26-vjeçari është lojtari më në formë i momentit nga kuqeiznjtë dhe pritet që Sylvinho ta grumbullojë në miqësoret para Euro 2024. Vlera e tij në treg është 1.4 milionë euro dhe 17 golat e këtij sezoni në të gjitha eventet kanë bërë të vetën.
Nëse Besiktas do afronte Manajn, sulmuesi do gjente në ekip Ernest Muçin dhe Milot Rashicën për të formuar një sulm tërësisht shqiptar.
