Shefi i Bashkimit Europian për Politikë të Jashtme dhe të Sigurisë, Josep Borrell, ka thënë se BE-ja po e mbështet bashkëpunimin ushtarak rajonal duke përmendur konkretisht Bosnjë-Hercegovinën dhe Maqedoninë e Veriut, duke theksuar se Europa është në rrezik. Sipas Borrell, shumë veprime janë bërë për të shtuar sigurinë evropiane, për të cilën kërkohet edhe më shumë. Ai ka shtuar se po mbështesin gjithashtu Moldavinë dhe Gjeorgjinë në fqinjësinë lindore dhe Jordaninë dhe Libanin në fqinjësinë jugore.
“Në Ballkanin Perëndimor, ne po mbështesim bashkëpunimin ushtarak rajonal, si dhe Bosnjë-Hercegovinën dhe Maqedoninë e Veriut. Ne po mbështesim gjithashtu Moldavinë dhe Gjeorgjinë në fqinjësinë lindore dhe Jordaninë dhe Libanin në fqinjësinë jugore”, ka shkruar ai në faqen zyrtare të BE-se.
Sipas tij, situata aktuale gjeopolitike po e vë Europën në rrezik, duke përmendur luftën hibride të karakterizuar nga sulmet kibernetike.
“Deri më tani i kemi përdorur 6.1 miliardë euro për të nxitur mbështetjen për Ukrainën nga vendet anëtare të BE-së dhe me to, BE-ja ka dorëzuar në total 31 miliardë euro pajisje ushtarake në Ukrainë që nga nisja e luftës. E kjo shifër po vazhdon të rritet çdo ditë. Ndër veprimet e tjera, deri në këtë verë do t’i kemi trajnuar 60.000 ushtarë ukrainas, i kemi dhuruar Ukrainës 500.000 predha artilerie dhe deri në fund të vitit do të jenë mbi 1 milion”, ka thënë Borrell.
