Kryeministri Edi Rama ka publikuar fotoalbumin e vizitës së tij në Francë, ndërsa e cilëson si një vizitë të nivelit më të lartë shtetëror që Shqipëria ka njohur në fushën e marrëdhënieve diplomatike mes dy vendeve.
“FotoALBUMI i vizitës së nivelit më të lartë shtetëror në historinë e marrëdhënieve diplomatike mes Shqipërisë dhe Francës”, shkruan Rama.
Rama u nderua sot në ceremoninë e mbajtur në Oborrin e Nderit të “Les Invalides”, në Paris, një kompleks i mirënjohur muzeal dhe monumentesh, të lidhura me historinë ushtarake e Francës. Kryeministri Rama dhe bashkëshortja Linda Rama, u pritën në portikun e hyrjes nga ministri për Europën Jean-Noël Barrot dhe nga guvernatori ushtarak i Parisit, gjeneral korparmate Christophe Abad.
Më pas, Kryeministri, i shoqëruar nga komandanti i trupës së Gardës Republikane, përshkoi Oborrin e Nderit, në prezencën e tri togave të rreshtuara të Gardës.
Himnet kombëtare të Shqipërisë dhe Francës vijuan protokollin e ceremonisë e më tej Kryeministri Rama i shoqëruar nga komandanti i trupës parakaloi para togave të Gardës.
Nderimet ushtarake para Kryeministrit Rama u paraqiten nga një detashment i përbërë nga orkestra e Gardës Republikane dhe tri toga të regjimenteve të Këmbësorisë të Gardës Republikane.
Në deklaratën e përbashkët për shtyp me presidentin Macron në Pallatin Elysee, kryeministri Rama vlerësoi ceremoninë ushtarake të pritjes në Oborrin e Nderit të “Les Invalides”, në Paris, ndërsa u shpreh se ishte hera e parë në historinë e marrëdhënieve dypalëshe diplomatike që një përfaqësues i shtetit shqiptar të pritej në atë mënyrë.
Gjatë vizitës dyditore në Francë u nënshkruan dhe disa marrëveshje bashkëpunimi./ata
