Presidenti Begaj takon raportuesen për Shqipërinë në PE, Isabel Santos: Nga anëtarësimi në BE, tek zhvillimet në rajon, ja për çfarë biseduam

Presidenti Bajram Begaj priti sot në takim raportuesen për Shqipërinë në Parlamentin Europian, Isabel Santos ku kanë diskutuar mbi anëtarësimin e Shqipërisë në BE.

Begaj tha gjatë takimit se mbështetja e Parlamentit Europian për Shqipërinë është e rëndësishme për arritjen e objektivave të vëna në kuadër të procesit të negociatave.

Duke u ndalur tek zhvillimet e reja gjeopolitike, pas agresionit rus në Ukrainë, Kreu i Shtetit nënvizoi, se Shqipëria do të mbetet një partner i besueshëm në kuadër të politikës së jashtme dhe të sigurisë së Bashkimit Evropian dhe do t’i bashkohet gjithmonë vendimeve e qëndrimeve të unionit.

Të dy bashkëbiseduesit u ndalën dhe në zhvillimet në rajonin e Ballkanit Perëndimor dhe sfidat specifike me të cilat po përballet ky rajon dhe vendet e tij, veçanërisht në kushtet e reja gjeopolitike.