Ministrja belge e Bashkëpunimit për Zhvillim, Caroline Gennez u bëri thirrje vendeve të Bashkimit Evropian (BE) që të ndalojnë shitjen e armëve për Izraelin.
Gennez para takimit të ministrave të Zhvillimit të BE-së tha se ndihma humanitare për Gazën duhet të rritet. "I bëj thirrje Komisionit Evropian të vazhdojë angazhimet dhe pagesat për Agjencinë e OKB-së për Refugjatët Palestinezë në Lindjen e Afërt (UNRWA). Raporti i Grupit të Pavarur të Shqyrtimit ofron siguri të mjaftueshme për ta bërë këtë", tha Gennez.
Ajo u bëri thirrje vendeve të BE-së të ndalojnë shitjen e armëve për Izraelin. "Mendoj se është koha për të ndaluar eksportimin e armëve në Lindjen e Mesme, Izrael dhe vendet në luftë", tha ministrja belge.
Duke argumentuar se sulmi tokësor i nisur nga ushtria izraelite në rajonin Rafah të Gazës "duhet të jetë vijë e kuqe", Gennez tha: "Ne kemi nevojë për qasje të zhbllokuar dhe të përhershme për ndihmën humanitare. Megjithatë, mëngjesin e sotëm lexova se kufijtë Rafah dhe Kerem Abu Salim (Shalom) ishin mbyllur. Fatkeqësia humanitare po rritet, duke kërcënuar miliona njerëz nga uria"./aa
