Qeveria ka rritur mbështetjen e fermerëve për zgjerimin e sipërfaqeve të mbjella me serra, si një potencial i madh në prodhimin bujqësor.
Ministrja e Bujqësisë dhe Zhvillimit Rural, Anila Denaj u shpreh se, falë mbështetjes synohet më shumë sipërfaqe për aktivitetin bujqësor dhe blegtoral për fermerët dhe bujqit.
Denaj bëri të ditur se, “miratuam të mërkurën VKM nr.283/2015, e cila përcakton rregullat, kriteret dhe procedurat për ndërtimin e objekteve për prodhimin, ruajtjen dhe përpunimin e produkteve bujqësore dhe blegtorale në tokë bujqësore”.
Denaj sqaroi se u zhbllokua një proces që ndikon direkt në punën e fermerëve dhe blegtorëve, nëpërmjet lehtësimit të procedurave të ndërtimit në zonat rurale – për objekte bujqësore; zvogëlimit të kritereve të distancave për ndërtimin e stallave; rritjes së sipërfaqes së tokës për serra nga 70% në 90% dhe rritjes së vëllimit të magazinimit dhe ruajtjes së prodhimit bujqësor.
Ministrja tha se, me lehtësitë e ofruara, fermerët për të njëjtin investim do të përfitohet më shumë hapësirë për aktivitet bujqësor e blegtoral, më shumë prodhim dhe mundësi të rritjes ekonomike në vlerë eksporti.
“Ky është vizioni ynë dhe kjo është puna jonë për bujqësinë e të ardhmes”, u shpreh Denaj./ata
