Venezuela njoftoi se ka ndërprerë marrëdhëniet diplomatike me Perunë, e cila nuk njohu rezultatet e zgjedhjeve presidenciale të mbajtura në vend më 28 korrik.
Në deklaratën e qeverisë venezueliane thuhet se Peruja shpërfilli vullnetin e popullit venezuelian dhe se marrëdhëniet diplomatike me këtë vend u ndërprenë. "Ne kemi vendosur të ndërpresim marrëdhëniet diplomatike me Perunë bazuar në nenin 45 të Konventës së Vjenës për Marrëdhëniet Diplomatike", thuhet në deklaratë.
Ministri i Jashtëm i Venezuelës, Yvan Gil, gjithashtu reagoi ndaj Perusë në llogarinë e tij në rrjetet sociale dhe kërkoi që të respektohet vullneti i popullit venezuelian. Pas zgjedhjeve presidenciale të mbajtura në Venezuelë, Peruja njoftoi se rezultatet nuk i duken bindëse dhe se do të njihte si president kandidatin e koalicionit opozitar, Edmundo Gonzalez.
Nicolas Maduro fitoi për herë të tretë në Venezuelë.
Sipas rezultateve të shpallura nga Këshilli Zgjedhor i Venezuelës, Maduro fitoi zgjedhjet presidenciale për herë të tretë më 28 korrik me 51.20 për qind.
Kandidati i koalicionit të opozitës venezueliane për Platformën e Bashkuar Demokratike (PUD), Edmundo Gonzalez njoftoi se ata nuk i njohën rezultatet e zgjedhjeve.
Të paktën 11 persona humbën jetën në incidentet që shpërthyen mes forcave të sigurisë dhe demonstruesve gjatë protestave të zhvilluara në vend me arsyetimin se rezultatet e zgjedhjeve ishin false./aa
