'Spectator': Si e mori mafia shqiptare kontrollin e rrjetit të trafikut në Europë

Nga Gavin Mortimer, SPECTATOR

Amerika duhet të bëhet e ashpër kundër karteleve meksikane të drogës, deklaroi në fillim të këtij muaji, ish-Prokurori i Përgjithshëm i SHBA, William Barr. Duke i krahasuar me ISIS-n, ai mbështeti një rezolutë të përbashkët nga dy senatorë republikanë, që i jep presidentit amerikan autoritet për të dërguar ushtrinë amerikane kundër karteleve në Meksikë.

Dështimi për të bërë këtë, paralajmëroi ai, do t’i lejonte kartelet të vazhdojnë të përmbysin SHBA-në me ‘drogat e tyre vdekjeprurëse në shkallë industriale’. Strategjia e Amerikës kundër drogës ishte e paefektshme, tha ai, ‘ajo e lë të paprekur zinxhirin e furnizimit të drogës... përparimi i vërtetë kërkon një sulm agresiv ndaj furnizimit me drogë në burimin e saj. Koka e gjarprit është në Meksikë’.

Europa duhet të zbatojë një qasje të ngjashme nëse dëshiron të zgjidhë krizën e emigrantëve. Marrëveshja e rënë dakord javën e kaluar mes Britanisë dhe Francës për të trajtuar krizën e anijeve të vogla në Kanal nuk do të ketë sukses më vete, sepse nuk e sulmon krizën në burimin e saj.

Rishi Sunak dhe Emmanuel Macron janë të vetëdijshëm për këtë. Në deklaratën e përbashkët të publikuar në përfundim të samitit të së premtes në Paris, kishte një zotim për të ‘forcuar shkëmbimin e informacionit dhe bashkëpunimin për një sërë kërcënimesh’, duke përfshirë këtu terrorizmin, trafikun e drogës dhe krimin e organizuar të lidhur me emigracionin.

Është e dukshme që ka pasur një ndryshim në retorikën e Sunak gjatë javëve të fundit. Qoftë gjatë seancës së pyetjeve, qoftë duke vizituar një qendër kontrolli në Dover apo duke folur në samitin anglo-francez në Paris, Sunak ka përsëritur se çelësi për të goditur krizën e emigrantëve është ‘thyerja e ciklit të bandave kriminale’.

Koka e gjarprit të trafikut të Europës është Shqipëria, rrjeti i fuqishëm mafioz i së cilës është përhapur në Perëndim prej dy dekadash. Vitin e kaluar, qeveria gjermane raportoi se kishte 40 banda shqiptare në vend, të cilat po pasuroheshin dhe po bëheshin më të dhunshme, ndërsa zgjeronin drogën dhe trafikun e njerëzve. Kjo prani përsëritet në Belgjikë, Spanjë, Greqi, Francë, Luksemburg dhe tani në Britani.

Pikat më të forta të mafies shqiptare janë, sipas policisë belge, ‘disiplina, besueshmëria dhe profesionalizmi i gangsterëve (dhe aftësia për t’u lidhur)... veçanërisht shpejt me organizatat e tjera kriminale’.

Një lidhje e tillë është me kartelet e drogës latino-amerikane, të cilat furnizojnë shqiptarët me kokainën që futet kontrabandë në Europë,” shkruan gazetari.

William Barr tregoi se si kartelet meksikane përdorin taktikat e ryshfetit dhe terrorit për të ngulitur veten. Ky ka qenë edhe modus operandi i mafies shqiptare. Në vitin 2016, Europol, agjencia e BE-së për bashkëpunimin në fushën e zbatimit të ligjit, raportoi se 90 përqind e emigrantëve që arrinin në BE, përdornin një rrjet kontrabande, duke gjeneruar nga 5 deri në 6 miliardë dollarë për bandat kriminale. Duke punuar me mafian italiane, shqiptarët, sipas një instituti francez, kanë korruptuar mijëra nëpunës civilë, të cilët për këtë arsye mbyllin sytë ndaj cilësisë së letrave false apo edhe ndihmojnë në nxjerrjen e tyre.

Shqipëria ngriti Strukturën e Posaçme kundër korrupsionit dhe Krimit të organizuar (SPAK) në vitin 2019, të kryesuar nga Arben Kraja, kryeprokuror special. Në një intervistë në vitin 2021, ai pranoi se ‘grupet e organizuara kriminale po rrisin aktivitetin e tyre... për të përfituar nga mundësitë e ofruara nga globalizmi’.

Kraja tha se SPAK u përball me një sfidë të madhe, një sfidë të vështirësuar nga ‘korrupsioni dhe mosndëshkimi i zyrtarëve të nivelit të lartë’. Mes të akuzuarve ose të dënuarve në Shqipëri për korrupsion është një ish-ministër i qeverisë dhe ish-kryeprokurori i vendit.

Mafia shqiptare ka krijuar rrjete trafikimi në të gjithë Afrikën e Veriut- nga Maroku në Libi- si dhe në Ballkan, duke kontrolluar rrugët e emigrimit dhe kampet e transitit. Vitet e fundit, ata janë shtyrë në veri të Francës, prandaj numri i varkave të vogla në të gjithë Kanalin ka ardhur në rritje që nga viti 2018. Megjithëse shqiptarët organizojnë rrjetet, zakonisht janë bandat kurde, siriane dhe marokene që janë të pranishme në plazhe.

Në një intervistë vitin e kaluar, Barr tha se ai kishte vizituar Meksikën disa herë si Prokuror i Përgjithshëm, por zbuloi se Andres Manuel Lopez Obrador ishte një president që ‘besonte te përqafimet, jo te plumbat’. Si pasojë, qeveria e tij kishte humbur kontrollin e vendit.

Europa nuk mund të lejojë një situatë të ngjashme në Shqipëri. Dhjetorin e kaluar, Rishi Sunak takoi kryeministrin shqiptar Edi Rama në Londër. Në një komunikatë të lëshuar nga Numri 10, u njoftua se të dy vendet do të ‘forcojnë më tej bashkëpunimin tonë të shkëlqyer operacional në zbatimin e ligjit, me objektivin e frenimit dhe ndërprerjes së emigracionit të paligjshëm dhe depërtimit në rrjetet kriminale... duke përfshirë, por pa u kufizuar në të dhëna efektive, ndarje informacionesh dhe ekipe të përbashkëta operacionale’.

Shumica e detajeve të këtij bashkëpunimi operacional nuk do të zbulohen, por a mund të jetë e ngjashme me ndihmën që Britania i dha Kolumbisë në vitet 1990 për të luftuar ata që SHBA (e cila kontribuoi me 2 miliardë dollarë ndihmë) i përshkruan si ‘narko-terroristët’? Mbështetja britanike përfshinte trajnimin nga SAS të policisë antidrogë të Kolumbisë dhe formimin e një qendre inteligjence dhe një komiteti të përbashkët të inteligjencës.

Nga 45 mijë emigrantë që kaluan ilegalisht në Angli vitin e kaluar, 12 mijë ishin shqiptarë. Nga ky numër, 10 mijë ishin meshkuj të moshës nga 20 deri në 40 vjeç. Në vitin 2020, numri i shqiptarëve që erdhën me varka të vogla në Angli ishte 50. ‘Rritja ka qenë eksponenciale dhe mendojmë se kjo është kryesisht për faktin se bandat kriminale shqiptare kanë fituar një bazë në veri të Francës,’ tha komandanti i kërcënimeve klandestine në Kanal, Dan O’Mahoney në tetor.

Agjencia Kombëtare e Krimit raportoi vitin e kaluar se mafia shqiptare në vitet e fundit ka importuar ekspertizë të fituar nga fermat e kanabisit në shkallë industriale në vendin e tyre për në Mbretërinë e Bashkuar. Ata gjithashtu kontrollojnë tregun e kokainës në vend.

BBC raportoi në nëntor se bandat shqiptare përdorin kampet e emigrantëve rreth Calais si një terren rekrutimi në këmbim të kalimit përtej Kanalit, mafia organizon që ata të punojnë në industrinë e tyre në rritje të drogës në Britani. Këto oferta shpesh bëhen me kërcënime ndaj emigrantit apo familjes së tyre në Shqipëri.

Këto janë fakte të shpërfillura në mënyrë rutinore nga ata në mediat sociale, që kundërshtojnë çdo operacion kundër gomoneve në Kanal. Dikush mund t’i quajë ata Idiotët e Dobishëm të Mafias Shqiptare.