Në drejtimin e kryetares Ina Zhupa Komisioni për Edukimin dhe Mjetet e Informimit Publik zhvilloi sot një seancë dëgjimore me Presidentin e Komitetit Olimpik Kombëtar Shqiptar (KOKSH), Fidel Ylli, në lidhje me pjesëmarrjen e Shqipërisë në veprimtaritë sportive ndërkombëtare dhe zhvillimin e sportit në Shqipëri.
Të ftuar në komision përveç Yllit ishin edhe Gerti Shima, Sekretar i Përgjithshëm i KOKSH dhe specialistë të tjerë të KOKSH.
Në nisje të fjalës se tij, Ylli bëri një prezantim të fokusit të punës të Komitetit Olimpik Kombëtar Shqiptar për të cilin tha se: “është Shtëpia e Sportit. Institucioni mbikëqyrës, mbështetës dhe promovues. Hartues politikash dhe strategjish në shërbim të sportit dhe sportistëve”
Sa i përket fokusit të punës, Ylli sqaroi se KOKSH nuk bën sport, por bën politika sportive, diplomaci sportive, në ndihmë të zhvillimit të sportit, harton strategji dhe programe edukimi në shkolla, negocion për buxhete e grante që të shkojnë direkt te sporti dhe Federatat dhe siguron trajnime dhe bazë materiale për shumë disiplina sportive.
Më tej kreu i KOKSH foli për Urdhërat Olimpikë, për Gala -në e sportit në dhjetor të vitit 2023 ku u bë vlerësimi më i rëndësishëm në 30 vitet e fundit për sportistët elitarë dhe e cilësoi atë si një iniciativë domethënëse për vlerësimin e sportistëve, që Komiteti Olimpik Kombëtar kërkon ta kthejë në një traditë, për të nderuar, vlerësuar dhe inkurajuar sportistët në karrierën e tyre. Më tej kreu i KOKSH veçoi disa nga medaljet e fituara nga sportistët Shqiptarë për vitin 2023 dhe foli për ekipet sportive në shkolla,vlerësimin për Tiranën si qyteti europian i sportit, maratonën e Tiranës, ditët olimpike, etj.
Në përfundim Ylli theksoi se, Komiteti Olimpik Kombëtar është sot një institucion elitar, që kontribuon për masivizimin e sportit në të gjithë vendin, për të shtrirë frymën Olimpike e për të rritur fëmijë e shoqëri më të shëndetshme; për evidentuar talente dhe për të rritur kampionët e së ardhmes./ata
