Një ngjarje e rëndë ka ndodhur ditën e sotme në Gjermani, ku si pasojë kanë mbetur 14 persona të plagosur. Mësohet se një tren rajonal goditi sot një tren mallrash të parkuar, duke lënduar 14 persona, tre prej tyre rëndë.
Sipas zëdhënësit të Policisë Federale, në mëngjes, një tren rajonal ka goditur anën e një treni mallrash të parkuar në një kalim në nivel. Policia ka dërguar një helikopter shpëtimi në vendin e aksidentit.
Treni rajonal, në të cilin ndodheshin rreth 30 persona, ra në shinat ngjitur gjatë udhëtimit dhe për këtë arsye goditi lokomotivën e trenit të mallrave, që ishte parkuar aty, tha zëdhënësi i policisë. Të dy trenat kanë mbetur në shina pas aksidentit./Dosja
