Një delegacion i Gjykatës Kushtetuese të Republikës së Shqipërisë, i kryesuar nga kryetarja e kësaj gjykate, Holta Zaçaj zhvilloi një vizitë pune dyditore pranë gjykatave më të larta në Mbretërinë e Bashkuar, në bashkëpunim me Zyrën e Prezencës së OSBE-së në Shqipëri, në kuadër të projektit “Forcimi i shtetit të së drejtës nëpërmjet mbështetjes së Gjykatës Kushtetuese”.

Gjatë kësaj vizite delegacioni i Gjykatës Kushtetuese zhvilloi takime me përfaqësues të Gjykatës Supreme dhe Gjykatës Administrative, si dhe me përfaqësues të Kolegjit Gjyqësor të Mbretërisë së Bashkuar.

Vizita synoi zgjerimin e njohurive mbi proceset dhe praktikat gjyqësore në Mbretërinë e Bashkuar, mbi zbatimin e parimeve të common-law dhe përdorimin e precedentit gjyqësor në vendimmarrje.

Në ditën e parë të vizitës delegacioni u prit nga Lord Chamberlain, i cili i njohu pjesëmarrësit me juridiksionin e Gjykatës Administrative të Apelit, veçanërisht me rolin e saj në kontrollin e ligjshmerisë së akteve të organeve shtetërore. Delegacioni pati mundësinë të ndiqte disa seanca gjyqësore, si dhe të zhvillonte një sesion diskutimi profesional dhe tepër të frytshëm me Lord Dungerman, gjyqtari që kryesonte trupën gjyqësore në këtë gjykatë. Kryetarja Zaçaj e falënderoi Lordin Dingerman për pritjen e shkëlqyer dhe për mbështetjen për nismën e organizimit të kësaj vizite.

Në ditën e dytë të vizitës, delegacioni është pritur nga Lady Rose dhe Lord Sales, gjyqtarë të Gjykatës Supreme të Mbretërisë së Bashkuar, të cilët u ndalën në sistemin e emërimit dhe karrierës së gjyqtarëve të Gjykatës Supreme në juridiksionin dhe përdorimin e precedentit në praktikën e kësaj gjykate. Në vijim, ata iu përgjigjën pyetjeve të shumta të bëra nga gjyqtarët e Gjykatës Kushtetuese duke dhënë përgjigje mjaft të vlefshme të ilustruara edhe përmes çështjeve konkrete nga praktika e tyre gjyqësore.

Po ashtu, gjyqtarët shqiptarë vizituan edhe Gjykatën e Lartë Tregtare, në të cilën biseduan  me gjyqtarin Robin Knowless sa i takon rolit dhe përvojës së kësaj gjykate në zgjidhjen e çështjeve tregtare dhe të arbitrazhit kundrejt edhe sfidave aktuale bashkëkohore./ata