Shqipëria nisi negociatat për grup-kapitullin “Themeloret”, në kuadër të anëtarësimit në Bashkimin Evropian. Pjesë e këtij grup-kapitulli është edhe Kapitulli 23, Gjyqësori dhe të Drejtat Themelore, i cili përfshin fushën e gjyqësorit, antikorrupsionin, të drejtat themelore dhe të drejtat e shtetasve të BE-së.
Ministri i Drejtësisë, Ulsi Manja nëpërmjet një postimi në rrjetet sociale thekson se Shqipëria është në rrugën pa kthim drejt Bashkimit Evropian.
Duke forcuar demokracinë dhe drejtësinë, nënvizon Manja, Ministria e Drejtësisë e cila udhëheq zbatimin e Kapitullit 23 dhe Kriterit Politik, do të punojë për një sistem të drejtë, të pavarur dhe të barabartë për të gjithë qytetarët.
“Duke forcuar demokracinë dhe drejtësinë si themelin e integrimit, Ministria e Drejtësisë udhëheq me përgjegjësi zbatimin e Kapitullit 23 dhe Kriterit Politik, për një sistem të drejtë, të pavarur dhe të barabartë për të gjithë qytetarët, me fokus në mbrojtjen e të drejtave themelore dhe standardet më të larta evropiane”, shkruan Manja./ata
