Piloti i Ferrarit, Charles Leclerc nga Monaco, fitoi Çmimin e Madh të SHBA-së në Formula 1 dje në Austin, Teksas, fitorja e tij e tretë këtë sezon.
Dyshja e skuadrës italiane Leclerc dhe Carlos Sainz përfunduan në dy vendet e para në raundin e 19-të me 56 xhiro të zhvilluar në pistën "Circuit of the Americas".
Leclerc arriti në linjën e finishit me një kohë prej një orë, 35 minuta dhe 09.639 sekonda, duke dalë fitimtar.
Shoku i tij i skuadrës në Ferrari, Sainz, ishte i dyti, pasi piloti spanjoll ishte 8.562 sekonda pas Leclerc.
Max Verstappen nga Red Bull, i cili fitoi tre tituj radhazi F1 në 2021-2023, doli i treti në Çmimin e Madh të SHBA-së pasi kundërshtari i tij më i afërt në Austin, Lando Norris (McLaren), u ndëshkua për parakalime të paligjshme.
Norris parakaloi garuesin holandez Verstappen jashtë pistës për të fituar një avantazh. Por garuesi britanik kishte një penallti prej pesë sekondash. Kështu që Norris u emërua i katërti nga organizatorët.
Më parë Leclerc gjatë këtij sezoni fitoi edhe Çmimet e Mëdha të Monaco-s dhe Italisë.
Verstappen ka shtatë fitore këtë sezon, dhe rivali i tij për titull, Norris fitoi tre gara.
Oscar Piastri (McLaren) dhe Lewis Hamilton (Mercedes) fituan nga dy gara, ndërsa George Russell (Mercedes) dhe Sainz (Ferrari) nga një.
Raundi i ardhshëm do të mbahet në Mexico City më 27 tetor. Sezoni do të kryhet më 8 dhjetor në Abu Dhabi.
Pesë vendet e para të klasifikimit të pilotëve dhe skuadrave janë si më poshtë:
- Pilotët
1. Max Verstappen (Holandë): 354 pikë
2. Lando Norris (Britani e Madhe): 297
3. Charles Leclerc (Monaco): 275
4. Oscar Piastri (Australi): 247
5. Carlos Sainz (Spanjë): 215
- Ekipet
1. McLaren: 544 pikë
2. Red Bull: 504
3. Ferrari: 496
4. Mercedes: 344
5. Aston Martin: 86
/aa
