SHBA dhe Kanadaja dërguan anije luftarake në Ngushticën e Tajvanit, ndërsa Kina lëshoi një paralajmërim, duke pretenduar se veprime të tilla "minojnë" paqen në rajon.
Sipas Flotës së 7-të të Marinës së SHBA-së, e cila operon në Azi-Paqësor, anija luftarake e klasit Arleigh Burke USS Higgins (DDG 76) dhe fregata e klasës Halifax e Marinës Mbretërore Kanadeze HMCS Vancouver (FFH 331) kryen një tranzit “rutinë” në Ngushticën e Tajvanit të dielën.
Në deklaratën e Flotës së 7-të të SHBA u tha se luftanijet lundruan përmes një "korridori të detit të hapur në ngushticën që është përtej ujërave territoriale të çdo shteti bregdetar".
Udhëtimi u përshkrua gjithashtu si demonstrim i "angazhimit të dy kombeve për ruajtjen e lirisë së lundrimit për të gjitha kombet si parim", shtohet në deklaratë.
Duke hedhur poshtë çdo "pohim të sovranitetit ose juridiksionit që është në kundërshtim me lirinë e lundrimit, fluturimit dhe përdorimeve të tjera të ligjshme të detit dhe ajrit", ushtria amerikane theksoi se të drejtat e komunitetit ndërkombëtar në Ngushticën e Tajvanit "nuk duhet të kufizohen".
Megjithatë, ushtria e Kinës paralajmëroi se kalimi i luftanijeve amerikane dhe kanadeze "prish paqen dhe stabilitetin e Ngushticës së Tajvanit".
Li Xi, zëdhënës i Komandës Lindore të Ushtrisë Çlirimtare Popullore Kineze (PLA), deklaroi se Kina është "në gatishmëri të lartë në çdo kohë dhe ruan me vendosmëri sovranitetin dhe sigurinë kombëtare, si dhe paqen dhe stabilitetin rajonal".
Li shtoi se forcat detare dhe ajrore të organizuara nga komanda "ndoqën dhe monitoruan nga afër kalimin e anijeve përmes ngushticës, duke adresuar situatën në përputhje me ligjet dhe rregulloret".
Ministria e Mbrojtjes e Tajvanit konfirmoi gjithashtu udhëtimin, duke deklaruar se luftanijet lundruan përmes Ngushticës së Tajvanit nga jugu në veri të dielën. Forcat e armatosura tajvaneze "ruajtën kontrollin e plotë mbi detin dhe hapësirën ajrore përreth, ndërsa situata mbeti normale", thuhet në platformën e mediave sociale X./aa
