Zëvendësministrja e Ekonomisë, Kulturës dhe Inovacionit, Olta Manjani u shpreh sot se, skema e pensioneve në vendin tonë, funksionon mbi bazën e parimit kontributiv, që do të thotë se qytetarët marrin mbrapsht kontributet që kanë derdhur ndër vite nga puna që kanë kryer.
Në takimin me pensionistë në qytetin e Durrësit, me pjesëmarrjen e kryeministrit Edi Rama dhe ministrat e linjës, Manjani theksoi se “ka dy elementë që ndikojnë në masën e pensionit: Vitet që kontribuojmë, por edhe mbi çfarë page kemi paguar kontributet e sigurimeve shoqërore”.
Sipas saj, është tjetër gjë të paguhen kontributet për 15 vite punë me pagë minimale, që është pensioni minimal, dhe tjetër gjë të punosh 38 vite të plota pune dhe të paguash kontribute mbi pagën maksimale.
“Këto janë dy elementë themelorë që përcaktojnë masën e pensionit”, u shpreh Manjani.
Ajo solli në vëmendje se gjatë vitit 2022 qeveria ka indeksuar dy herë pensionet dhe ka dhënë tre bonuse. Gjithashtu me reformën e vitit 2014 u arrit shtimi me 290 mijë i numrit të kontribuesve në skemë dhe pensionet u lidhën me masën kotributive.
Ajo u ndal në risitë që parashikon të sjellë reforma e re e skemës së pensioneve, ku veçoi se pensionistët që punojnë pas daljes në pension, çdo kontribut që ata derdhin do t’iu llogaritet njësoj si para viteve të daljes në pension.
“Një element tjetër që po ndërmerr qeveria me reformën e pensioneve është dhe njohja automatike e viteve të punës për të gjithë qytetarët që kanë punuar në ish-kooperativat bujqësore, apo ndërmarrjet bujqësore para viteve 1993”, tha Manjani, teksa bëri të ditur se, për një reformë sa më bashkëkohore qeveria po sheh eksperiencat europiane për të zhvilluar dhe ndërtuar skemën e pensioneve me të gjithë faktorët e tregut të punës./ata
