Dëshmi tronditëse vijnë pas ngjarjes së rëndë në Beograd, ku një 14-vjeçar qëlloi me armë brenda një shkollë duke vrarë 8 nxënës dhe një roje dhe plagosur 6 fëmijë të tjerë dhe një mësuese.
Një vajzë ka qenë dëshmitare e vrasjes së rojës, teksa tregon e shokuar ngjarjen për mediat vendase.
“Pashë rojën e shkollës përtokë në momentin e tmerrshëm të vrasjes”, tregon ajo.
“Unë po këndoja dhe dëgjoja vetëm tinguj dhe mendova se djemtë po hidhnin fishekzjarre. Pashë rojën e sigurisë të rrëzuar përtokë. U ktheva aty ku isha, u thashë mësuesve se pashë që po gjuanin. Një shok më tha që gjuajtësi ka hyrë në klasën e tyre, një djalë është qëlluar në këmbë, një vajzë… Kam dëgjuar që ka qëlluar vazhdimisht, nuk ka qenë një nga një, por vazhdimisht. Nuk e dinim se çfarë po ndodhte, gjithçka e morëm me mesazhe. Ishte ngjitur me palestrën, një hapësirë e vogël ku u futëm të gjithë. Ne ishim ulur atje, kështu që na transferuan në një sallë tjetër, ku ishte edhe më e sigurt”, deklaroi Evgenia.
“Nuk doja t’i tregoja mamit, nuk e dija ku ishte. Më vonë i thashë se isha i sigurt. Ne shkuam në të njëjtin departament. Ai ishte i qetë dhe i këndshëm, kishte nota të mira. Nuk dija shumë për të, por nuk do ta prisja që të ndodhte një gjë e tillë”, ka thënë më tej vajza për “Prva”.
Sipas Blic.rs, tre fëmijë të plagosur janë në terapi intensive, një vajzë po i nënshtrohet operacionit dhe mjekët po luftojnë për jetën e saj.
Mjekët e urgjencës gjithashtu kanë qenë dëshmitarë të momenteve të para pas tragjedisë dhe ata ndonëse kanë parë shumë janë ende të tronditur.
“Kur arritëm në shkollë, gjetëm tetë të plagosur, roja ishte i vdekur. Katër fëmijë janë pranuar në urgjencë dhe ndodhen në sallën e operacionit, një person është në rrezik. E gjithë ER-ja po qan, po dridhemi”, thonë për “Blic”.
