Eurostat ka publikuar dy raporte të reja nëpërmjet të cilave analizon fuqitë blerëse të familjeve shqiptare dhe nivelin e çmimeve në ekonomi, nëse mund të konsiderohemi relativisht një vend i lirë apo i shtrenjtë.
Kështu në raportin e konsumit familjar, Shqipëria është e fundit në rajon. Në vendin tonë fuqia blerëse është 40% e mesatares evropiane. Pra, një familje shqiptare mund të konsumojë vetëm 40% të gjërave të një qytetari europian. Në rajon pas nesh vjen Maqedonia e Veriut, Bosnja më pas Serbia dhe në krye qëndron Mali i Zi.
Sa i përket nivelit të çmimeve shifrat gjithashtu nuk janë premtuese. Vendi ynë në këtë aspekt renditet i dyti në rajon. Çmimet tona janë sa 61.3% e mesatares europiane, në një garë ku para nesh qëndron vetëm Serbia.
Eurostat bën edhe diferencim të çmimeve për grupe të ndryshme artikujsh. Kështu Shqipëria tejkalon mesataren e çmimeve europiane për këpucët (105.8%) si dhe në komunikacion (116.2%). Edhe për produktet elektronike(121.7%) dhe pajisjet shtëpiake (122.2%) e tejkalojmë mesataren e çmimeve të BE-së.
Ndërkohë sipas Eurostat vendi ka nivelin më të ulët të çmimeve për produktet energjitike(40.9%), ndikuar kryesisht nga çmimi i subvencionuar i energjisë elektrike si dhe për hotelet dhe restorantet (46.8%) dhe transportin publik(49.9%)
Ndërkohë një tregues tjetër i publikuar nga Eurostat tregon se shpenzimet për ushqime në raport me PBB-në ishte 31.2%, ndërsa mestarja e BE-së qëndron në 6.6%. Në këtë mënyrë jemi vendi me harxhimet më të larta në rajon për shpenzimet për ushqime.
