Presidenti turk, Recep Tayyip Erdoğan, ka deklaruar se rritja e ndërgjegjësimit për "barbaritë" e kryera nga Izraeli kundër popullit të Gazës dhe parandalimi i dezinformatave izraelite janë ndër detyrat kryesore të Türkiyes.
"Regjistrimi dhe shpallja e barbarive kundër vëllezërve tanë të Gazës dhe parandalimi i përpjekjeve të dezinformimit të Izraelit janë ndër detyrat tona më të rëndësishme", tha Erdoğan në një video-mesazh për Sesionin e Jashtëzakonshëm të Konferencës Islamike të Ministrave të Informacionit, një ngjarje në Istanbul që përfshin vendet anëtare dhe vëzhguese të OIC-it.
Erdoğan tha se Izraeli po përdor të gjitha mjetet në dispozicion për të mbuluar "luftën dhe krimet kundër njerëzimit", duke përfshirë propagandën dhe shtrembërimin e fakteve.
Presidenti turk theksoi se Izraeli gjithashtu ka përfituar nga ndikimi i tij mbi organizatat globale të medias, ndërsa në të njëjtën kohë ka përshpejtuar përpjekjet e tij për dezinformim.
Duke theksuar se mediat perëndimore kanë kontribuar në "makinerinë e propagandës" të Izraelit me mbulimin e tyre të njëanshëm, Erdoğan tha se kombet muslimane kanë për detyrë të "parandalojnë gënjeshtrat nga errësimi i së vërtetës".
“Administrata izraelite, e mbështetur nga mbështetja e pakushtëzuar e fuqive perëndimore, po masakron brutalisht gazanët të cilët i ka shtrydhur në një copë toke të vogël”, tha Erdoğan, duke shtuar se gratë, fëmijët dhe të moshuarit përbëjnë shumicën dërrmuese të vdekjeve nga sulmet izraelite në enklavën palestineze.
Duke theksuar se forcat izraelite kanë vënë në shënjestër edhe anëtarë të shtypit, presidenti turk tha se "numri i anëtarëve të mediave të vrarë nga Izraeli për të heshtur zërin e shtypit të lirë është mbi 100".
Sulmet izraelite kanë vazhduar pandërprerë në enklavën palestineze, megjithatë edhe dërgesat e ndihmave mbeten mjerisht të pamjaftueshme për të trajtuar katastrofën humanitare.
Izraeli ka goditur Rripin e Gazës që nga sulmi ndërkufitar i Hamasit më 7 tetor, ku deri më tani janë vrarë të paktën 29.606 palestinezë, kryesisht gra dhe fëmijë, si dhe janë plagosur rreth 69.730 të tjerë.
Lufta izraelite në Gaza ka çuar në zhvendosjen e brendshme të 85 për qind të popullsisë së territorit palestinez mes mungesës akute të ushqimit, ujit të pastër dhe ilaçeve. Po ashtu 60 për qind e infrastrukturës së enklavës është dëmtuar ose shkatërruar.
Për herë të parë që nga krijimi i tij në vitin 1948, Izraeli akuzohet për gjenocid në Gjykatën Ndërkombëtare të Drejtësisë për luftën në Gaza. Një vendim i përkohshëm në muajin janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza./aa
