Ura e Madhe e Kukësit me gjatësi 310 metra, pjesë e munguar e Rrugës së Kombit, po shkon drejt përfundimit.
Kryeministri Edi Rama ndau këtë mbrëmje foto të urës së re.
Ura e re e Kukësit ka dy bazamente prej betoni në brigjet e liqenit, ndërsa në të gjithë gjatësinë e saj është konstruksion metalik, me një hark të madh pa këmbë të ndërmjetme.
Ura e Madhe e Kukësit bashkon brigjet e Drinit në Rrugën e Kombit.
Ajo po zëvendëson urën e vjetër ekzistuese që ka më shumë se 45 vite që mban “mbi supe” me mijëra mjete përgjatë viteve.
Investimi prej 30 milionë dollarësh e bën atë një ngjarje ekonomike për zonën dhe lidhjen e Shqipërisë me Kosovën.
Për shkak të punimeve për vendosjen me rrëshqitje të urës së re mbi bazamentet e saj, qarkullimi është devijuar në aksin Kukës-Morinë, pjesë e Rrugës së Kombit, dhe konkretisht, devijimi i lëvizjes po bëhet tek Ura Drinit të Zi – Rruga hyrëse në qytetin e Kukësit dalja për Kosovë në nyjën e Shtiqnit.
Ndërsa për lëvizjen nga Morina në Milot, devijimi i lëvizjes po bëhet tek rampa dalëse e mbikalimit tek nyja e re e aeroportit dhe dalja në urën e Drinit të Zi./ata
