Niveli i kredive me probleme në Shqipëri në muajin mars zbriti në nivelin e ulët historik. Bizneset dhe qytetarët po i paguajnë në kohë kreditë, edhe pse interesat janë rritur. Aktualisht sipas raportit të Bankës së Shqipërisë janë 4.64% nga 5.15% që ishte në të njëjtin muaj të vitit të kaluar.
35.4 miliardë lekë të reja janë kreditë me probleme në sektorin bankar dhe në raport me marsin e vitit të kaluar, stoku i kredisë së keqe është në rënie me 1.2 miliardë lekë. Edhe pse pritej që portofoli i keq të zgjerohej për shkak të rritjes së normës bazë të interesit që solli rritje edhe të normave për kreditë që jepnin bankat, situata e mirë ekonomike, zhvlerësimi i valutave dhe aftësia paguese e klientëve kanë ndikuar pozitivisht.
“Ky përmirësim është vënë re në të gjitha portofolet e kredisë, por ka qenë më i dukshëm në portofolin e kredisë në monedhë të huaj, në kredinë afatgjatë dhe në kredinë për bizneset”, thotë Banka e Shqipërisë.
Forcimi i ndjeshëm i lekut ndaj euros dhe dollarit në raport me vitin e kaluar, ka bërë që kostot e kthimit të kredisë së marrë në euro të ulen. Në raportin e stabilitetit financiar Banka e Shqipërisë ka listuar edhe disa nga faktorët e tjerë që kanë ndikuar në rritjen e cilësisë së kredisë.
“Pavarësisht pritjeve, rritja e normave të interesit nuk ka shfaqur ende një ndikim të dukshëm negativ në cilësinë e kredisë. Rënia e kredive me probleme lidhet me riklasifikimin e kredive me probleme në klasa më të mira, fshirjen e kredive të humbura, si dhe shlyerjen e një pjese të kredive me probleme”, thotë Banka e Shqipërisë.
Por edhe bankat prej disa muajsh po tregohen më të kujdesshme në dhënien e kredisë, dhe kanë shtrënguar kushtet e kreditimit, në mënyrë që të mos rrezikojnë, duke shmangur rritjen e kredisë së keqe. Totali i kredisë së dhënë për ekonominë deri në fund të muajit mars ishte 763 miliardë lekë, nga 711 miliardë lekë që raportohet në fund të marsit të vitit 2023./Shqiptarja
KREDITË ME PROBLEME NË %Mars 2023 5.15%Mars 2024 4.64%Rënia -0.51%TOTALI I KREDISË PËR EKONOMINËMars 2023 711,453 mld lekëMars 2024 763,204 mld lekëRritja + 51,751 mld lekëKREDIA ME PROBLEME NË VLERËMars 2023 36,639 mld lekëMars 2024 35,412 mld lekëRënia -1,227 mld lekë
