Votuesit në Francë do të hedhin votën e tyre sot për të zgjedhur anëtarët e rinj të parlamentit.
Mbi 49 milionë votues të regjistruar do të mund të votojnë për të zgjedhur 577 anëtarë të Asamblesë Kombëtare, dhomës së ulët të parlamentit, për një mandat pesëvjeçar.
Qendrat e votimit u hapën në orën 8:00 të mëngjesit, ndërsa votimi do të vazhdojë për 12 orë.
Presidenti francez Emmanuel Macron shpërndau parlamentin dhe shpalli zgjedhje të parakohshme pasi partia Tubimi Kombëtar e ekstremit të djathtë (RN) mori më shumë se 31 për qind të votave në zgjedhjet e Parlamentit Evropian më 9 qershor, duke mundur bllokun e tij qendror.
Zgjedhjet parlamentare do të mbahen në dy raunde, ku i dyti do të zhvillohet më 7 korrik.
Një partie apo aleance politike i duhen të paktën 289 vende për të siguruar shumicën në Asamblenë Kombëtare.
Kandidatët kanë nevojë për një shumicë prej të paktën 50 për qind në zonën e tyre zgjedhore për t’u zgjedhur në raundin e parë, ndërsa pjesëmarrja duhet të jetë së paku 25 për qind.
Të gjithë kandidatët, votat e të cilëve janë më pak se 12,5 për qind e votuesve të regjistruar, eliminohen nga gara dhe nuk do të kualifikohen për në raundin e dytë.
Një balotazh mund të ketë midis dy ose më shumë kandidatëve për një vend të caktuar, i cili do të shkojë tek kandidati me numrin më të lartë.
Tri aleanca kryesore dominojnë skenën: aleanca e krahut të djathtë të RN dhe Republikanët, aleanca centriste “Së bashku për Republikën” dhe krahu i majtë “Fronti i Ri Popullor”.
Në një njoftim lidhur me pyetjet mbi planet e tij të ardhshme, presidenti Macron ka thënë se ai synon të qëndrojë deri në zgjedhjet e ardhshme presidenciale në vitin 2027./aa
