Turistët po mbajnë të larta çmimet e qirave në Tiranë. Veçanërisht në zonën afër qendrës së kryeqytetit, përfshirë Pazarin e Bulevardin e Ri, Rrugën e Elbasanit, stadiumin “Air Albania” apo Ish-Bllokun, qiraja mujore e një apartamenti luhatet nga 500 e deri në 1 mijë e 200 euro.
“Sot që flasim janë disa kompani që japin apartamente me qira në Booking apo AirBnb që kanë nga 40 apartamente. Veçanërisht në zonat afër qendrës së Tiranës, turizmi i ka shtrenjtuar shumë qiratë”, tha Erjon Alimema, agjent i pasurive të patundshme.
Sipas studimeve të Bankës së Shqipërisë çmimet e shitblerjen së apartamenteve në kryeqytet po zbuten, por e kundërta po ndodh me qiratë.
Nga turistët ka shumë kërkesa për qira ditore dhe afatshkurta dhe kjo ka ndikuar edhe te qiratë mujore në shtrenjtimin e tyre. Ne mendojmë se është krijuar një tavan te qiratë”, u shpreh Sonila Xhafa, agjente e pasurive të patundshme.
Për apartamentet e banimit pranë zonave, si “Stadiumi Dinamo”, shkolla e mesme “Petro Nini Luarasi” apo Liqeni Artificial, çmimi mesatar i qirave për apartamentet 1+1 varion nga 600 deri në 700 euro në muaj nga rreth 500 euro një vit më parë.
“Çmimet e qirave nuk mund të rriten më tej pasi nuk ka më logjikë ekonomike. Edhe ai që merr një apartament me qira afatgjatë për ta punuar si AirBnb duhet të nxjerrë një fitim”, theksoi Xhafa.
E nëse flukset e turistëve vijojnë me të njëjtin ritëm, me pjesën më të madhe të tyre që “ngecin” në Tiranë, agjentë imobiliarë paralajmërojnë më shumë dhimbje koke veçanërisht për studentët.
“Studentët kur të rikthehen pa pushime nuk do të gjejnë çmime më të lira. Veçanërisht në zonat afër universiteteve dhe fakulteteve që ata duan qiratë janë të shtrenjta”, u shpreh Alimema.
Sipas të dhënave të AirDNA, e cila analizon statistikat për strukturat e akomodimit me qira ditore nga platforma Airbnb, numri i apartamenteve dhe shtëpive të listuara për dhënie me qira ditore në Tiranë ka arritur në rreth 50 mijë./Tema
