Zbatimi nga qeveria e skemave të subvencionimit në bujqësi, si dhe rritja e ndërgjegjësimit për nevojën e pagesës së kontributeve kanë sjellë një shtim të numrit të të siguruarve që punojnë si të vetëpunësuar.
Ministri i Ekonomisë, Kulturës e Inovacionit, Blendi Gonxhja, bëri të ditur se, për periudhën janar – qershor 2024 numri i të siguruarve si të vetëpunësuar në bujqësi arriti në 24,930, me 15.2% më shumë se e njëjta periudhë një vit më parë.
Ministri njoftoi se Instituti i Sigurimeve Shoqërore dhe Drejtoritë Rajonale po ndërmarrin fushata të vazhdueshme të ndërgjegjësimit në terren, me qëllim që të vetëpunësuarit në bujqësi të përfitojnë nga avantazhet që ofrojnë skemat e dedikuara për këtë kategori.
Bujqësia është një sektor i rëndësishëm në ekonominë e vendit ndhe jë burim i rëndësishëm punësimi.
Bujqësia vitet e fundit, po vijon të rrisë në mënyrë të qendrueshme kontributin e saj në PBB dhe ka rritur forcën e angazhuar në punë në sektorin rural në nivelin 33.9 % të totalit të të punësuarve në shkallë vendi.
Sipas statistikave nga INSTAT të publikuara së fundi mbi “Tregun e Punës 2023”, rezulton se bujqësia punëson 33.9 për qind të totalit të individëve në marrëdhënie pune.
Tashmë fakt është që ekonomitë rurale krahas modelit të vetëpunësimit familjar po orientohen në zgjerimin e punësimit në mbi 10 persona, në varësi edhe të zhvillimit të aktivitetit të tyre, duke kontribuar në rritjen e angazhimit me punë në këtë sektor.
Referuar të dhënave nga këndvështrimi i grup-profesioneve, rezulton se në vitin 2023, punonjësit e kualifikuar të bujqësisë dhe të lidhur me tregtinë, përbëjnë 46,2 % të të punësuarve./ata
