Kryetarja e Kuvendit, Elisa Spiropali njoftoi një ditë më parë anulimin e seancës së sotme plenare për shkak të vizitës së Presidentit turk, Recep Tayip Erdogan sot në Tiranë.
Lidhur me këtë vendim ka reaguar grupi parlamentar i PD duke e cilësuar antikushtetues. Në deklaratën për mediet, PD thekson se “dënojnë me forcë sjelljen e kryetares së Kuvendit Elisa Spiropali që sipas tyre, hap e mbyll punimet e Kuvendit pa konsultime”.
“Kuvendi i Shqipërisë është institucion kushtetues, që funksionon sipas Kushtetutës dhe Rregullores së Kuvendit. Seanca plenare dhe plani i punës së Kuvendit miratohen nga Konferenca e Kryetarëve me mirëkuptim apo nga seanca plenare, që ka përcaktuar me vendim se dita e enjte, datë 10 Tetor 2024, është ditë për mbledhjen e Kuvendit në seancë plenare. Kryetarja e Kuvendit ka vetëm detyrimin për të caktuar çështjet qe trajtohen, pra Rendin e Ditës. Anulimi i seancës me vendim personal të Elisa Spiropalit është antikushtetues dhe bie ndesh me çdo parim demokratik të funksionimit të Parlamentit”, thekson PD.
Në njoftim, grupi parlamentar i PD, shton se “Kuvendi është tempulli i përfaqësimit të qytetarëve, që nuk mund të trajtohet kurrë si qelia e Pëllumb Gjokës. Grupi Parlamentar i Partisë Demokratike dënon me forcë sjelljen e Kryetares së Kuvendit Elisa Spiropali, që hap e mbyll punimet e Kuvendit, pa asnjë konsultim, pa ndjekur asnjë rregull, duke shkelur Kushtetutën dhe Rregulloren e Kuvendit, dhe duke e shndërruar zyrtarisht Parlamentin e Shqipërisë në qelinë personale në burg ku strehohet Pëllumb Gjoka apo të ngjashmit e tij”./ata
