Qeveria e Ruandës ka vendosur të sigurojë lidhje interneti për të gjitha shkollat në vend deri në fund të vitit 2024.
Sipas lajmit të medias kombëtare, Qeveria e Ruandës ka zbatuar "Programin e Lidhjes së Shkollës".
Në kuadër të programit synohet të ofrohet internet me shpejtësi të lartë në shkollat fillore dhe të mesme në vend deri në fund të vitit 2024.
Lidhja e internetit me shkollat në Ruandë do të ofrohet nga satelitët Starlink në pronësi të kompanisë SpaceX të Elon Musk-ut.
Në hapin e parë, planifikohet të ofrohet internet në 500 shkolla me satelitë Starlink.
Ministri i Shtetit për Arsimin Fillor dhe të Mesëm në Ruandë, Gaspard Twagirayezu deklaroi se ata donin të siguronin lidhje interneti për të gjitha shkollat, por ajo nuk mund të dërgohej në disa rajone.
Ai tha se lidhja me internetin nëpërmjet sistemit satelitor është një hap i rëndësishëm për të arritur shkollat në zona të largëta.
Çfarë është Starlink?
Starlink është një sistem i bazuar në hapësirë, mbi të cilin SpaceX ka punuar prej vitesh për të lehtësuar aksesin në internet në pjesët e pashërbyera të botës.
Mijëra satelitë Starlink në orbitën e kompanisë SpaceX të Musk ofrojnë internet me shpejtësi të lartë dhe me brez të gjerë në skajet më të largëta të botës.
SpaceX planifikon të krijojë një rrjet prej 12 mijë satelitësh në orbitën e tokës me satelitët Starlink. Projekti synohet të përfundojë në vitin 2027./AA
