Rusia ka nisur stërvitjet ushtarake që përfshijnë raketën balistike ndërkontinentale "Yars", njoftoi sot Ministria e Mbrojtjes, transmeton Anadolu.
Më shumë se 3.000 ushtarë dhe 300 njësi të pajisjeve ushtarake po marrin pjesë në stërvitjet, të cilat po zhvillohen në tre rajone të Siberisë, përfshirë Omsk dhe Novosibirsk, tha ministria.
Stërvitjet ushtarake zhvillohen në përputhje me planin stërvitor të Ministrisë së Mbrojtjes së Rusisë për këtë vit dhe kanë për qëllim stërvitjen manovruese.
Vëmendje e veçantë do t'i kushtohet përdorimit të dronëve me modifikime të ndryshme, thuhet në njoftim.
Nuk dihet shumë për karakteristikat taktike dhe teknike të sistemit "Yars", i cili thuhet se ka një rreze operative prej 12 mijë kilometrash.
Sipas ekspertëve ushtarakë, sistemet "Yars" mund të mbajnë shumë koka bërthamore të vendosura në mënyrë të pavarur, të montuara në kamionë./AA
