Strehonin në banesë emigrantë për t’i transportuar dhe kultivonin kanabis, shkon në katër numri i të arrestuarve

Një 25 vjeçar i shpallur në kërkim është arrestuar, pasi në bashkëpunim me persona të tjerë, transportonin emigrantë të paligjshëm dhe kultivonin kanabis.

Emanuel Gjergji u kap në fshatin Zejmen të Lezhës, pasi pak ditë më parë në një operacion të të organizuar nga policia, u gjetën në një banesë të strehuar 9 shtetas të huaj.

Gjergji së bashku me 3 persona të tjerë, të cilët janë arrestuar, dhe një tjetër, i cili është shpallur në kërkim, transportonin emigrantët nga Saranda në Tiranë, i strehonin disa ditë në Pezë Helmës dhe më pas i transportonin ata drejt kufirit me Malin e Zi, kundrejt pagesës, me qëllim kalimin në vendet e BE-së.

Gjatë kontrollit të ushtruar në banesën e njërit prej personave të arrestuar ku u gjetën të strehuar emigrantët, në oborr janë gjetur gjithashtu 114 kubikë me fara kanabisi, gati për t’u kultivuar.

Policia bën të ditur se vijon puna për kapjen e shtetasit tjetër të shpallur në kërkim në kuadër të këtij operacioni, ndërsa materialet i kaluan Prokurorisë, për veprime të mëtejshme procedurale.

“Tiranë /Vijon operacioni policor i koduar “Tempizëm 23”, shkon në 4 numri i të arrestuarve. Vihet në pranga një shtetas i shpallur në kërkim në kuadër të këtij operacioni, si rezultat i të cilit u godit një rast i dhënies ndihmë për kalim të paligjshëm të kufijve dhe një rast i tentativës për të kultivuar bimë narkotike. Gjatë operacionit të zhvilluar disa ditë më parë, në një banesë, u gjetën të strehuar 9 shtetas të huaj, ndërsa në oborrin e kësaj banese u gjetën 114 kubikë me fara kanabisi.

Specialistët për Hetimin e Krimeve të Komisariatit të Policisë Nr. 6, në vijim të punës për kapjen e shtetasve të shpallur në kërkim dhe vënien e tyre përpara përgjegjësisë ligjore, kanë kapur dhe ndaluar shtetasin E. Gj., 25 vjeç, banues në fshatin Zejmen, Lezhë, i cili ishte shpallur në kërkim në kuadër të operacionit policor të koduar “Tempizëm 23”.

Ky shtetas ishte shpallur në kërkim pasi dyshohet se në bashkëpunim me 4 shtetas të tjerë (3 të vënë në pranga, 1 ende në kërkim) ushtronte veprimtarinë kriminale të dhënies ndihmë emigrantëve, për kalim të paligjshëm të kufirit. Këta shtetas transportonin emigrantë të paligjshëm, nga Saranda në Tiranë, i strehonin disa ditë në Pezë Helmës dhe më pas i transportonin ata drejt kufirit me Malin e Zi, kundrejt pagesës, me qëllim kalimin në vendet e BE-së.

Gjatë operacionit të zhvilluar disa ditë më parë, në banesën e njërit prej shtetasve të arrestuar u gjetën të strehuar 9 emigrantë të paligjshëm. Gjithashtu, në oborrin e kësaj banese u gjetën 114 kubikë me fara kanabisi, gati për t’u kultivuar.

Vijon puna për kapjen e shtetasit tjetër të shpallur në kërkim në kuadër të këtij operacioni. Materialet i kaluan Prokurorisë, për veprime të mëtejshme procedurale”, sipas njoftimit të policisë.