Kryetari i PL, Ilir Meta ka reaguar nëpërmjet një postimi në rrjetet sociale për arrestimin e Frdi Belerit, kandidat i koalicionit “Bashkë Fitojmë” për bashkinë e Himarës.
Meta thotë se arrestimi i Belerit është një sulm i paramenduar dhe i inskenuar pasi Rama është frikësuar për humbjen e zgjedhjeve më 14 maj.
Më tej, kryetari i PL, u bën thirrje qytetarëve të Himarës të vijojnë fushatën në Himarë dhe të marrin pjesë në zgjedhjet e së dielës.
“Pjesëmarrje, pjesëmarrje dhe vetëm pjesëmarrje! Ky ështe ilaçi ndaj një Kryeministri dhe një regjimi, që po jep shpirt dhe të tmerruar nga vota e lirë. Ndërsa SPAK nuk vepron ndaj dhjetëra Kryetarëve të Bashkive, që shkelin ligjin dhe vërtetohen si fajtorë, pas sulmeve të paramenduara dhe të inskenuara të Kryeministrit delinkuent, rrëmbehet pas mesnate në mënyrë mafioze Kandidati për Kryetar i Bashkisë në Himarë. Të gjithë qytetarët dhe strukturat opozitare në Himarë të jenë në këmbë, të fuqizojnë në maksimum fushatën dhe të intensifikojnë kontaktet me zgjedhësit për të votuar masivisht dhe për t’i dhënë goditjen përfundimtare Kryeministrit, grabitësit dhe shkatërruesit më të madh për qëllime mafioze të pronave në Himarë dhe gjithë bregdetit të Jugut nga Vlora deri në Ksamil”,-shkruan Meta.
